Այրված տոստերը չեն բարձրացնում քաղցկեղի առաջացման վտանգը. Cancer Research UK

Այրված հացը պարունակում է վնասակար միացություն, որը կարող է վնասել ԴՆԹ-ն եւ մեծացնել քաղցկեղի առաջացման վտանգը։ Սակայն դրա խտությունն այնքան ցածր է, որ առողջության համար լուրջ վտանգ չի ներկայացնում։ Այս մասին հայտնել է քաղցկեղի ուսումնասիրման Cancer Research UK բարեգործական եւ հետազոտական ​​կազմակերպության ներկայացուցիչ Էդ Յանգը։

Գիտնականները հաստատել են, որ օսլա պարունակող մթերքները (օրինակ՝ կարտոֆիլը եւ հացը) տապակելն իսկապես արտադրում է ակրիլամիդ՝ պոտենցիալ քաղցկեղածին նյութ, որը հայտնաբերվել է նաեւ ծխախոտի ծխում: Սակայն հետազոտության ​​տվյալները ցույց են տալիս, որ մարդկանց համար իրական վտանգները խիստ չափազանցված են:

Յանգի խոսքով՝ կենդանիների վրա վաղ փորձարկումներում օգտագործվել են ակրիլամիդի չափազանց բարձր չափաբաժիններ, որոնք համադրելի չեն այն քանակության հետ, որը մարդիկ օգտագործում են սննդի մեջ: Հետեւաբար, նման ուսումնասիրությունների արդյունքները չի կարելի կիրառել մարդկանց վրա:

Մասնագետներն ընդգծել են, որ օնկոլոգիական հիվանդությունների առաջացման ռիսկի հիմնական գործոն է ալկոհոլի, կարմիր մսի եւ վերամշակված մսի մշտական, ինչպես նաեւ ճարպերի, շաքարի եւ աղի բարձր պարունակությամբ մթերքների օգտագործումը։

Հետևեք NEWS.am Medicine-ին Facebook-ում և Twitter-ում