Սննդակարգում երկաթի անբավարարությունը մեծացնում է շնչառական վիրուսներով վարակվելու ռիսկը․ JI

Կոլումբիայի համալսարանի գիտնականները պարզել են, որ երկաթի ցածր պարունակությամբ դիետան խախտում է թոքերում T-բջիջների աշխատանքը և թուլացնում է պաշտպանությունը շնչառական վիրուսներից։ Հետազոտության արդյունքները հրապարակվել են The Journal of Immunology (JI) ամսագրում։

Փորձի ընթացքում մկներին դրել են ցածր երկաթով սննդակարգի վրա և վարակել գրիպի վիրուսով: Գիտնականները հետևել են, թե ինչպես են կրծողների իմունային T բջիջները ձևավորում հիշողության բջիջները:

Հիշողության բջիջներ են կոչվում լիմֆոցիտների պոպուլյացիաները, որոնք պահպանում են նախկինում գործած անտիգենների մասին տեղեկատվությունը և ձևավորում երկրորդային իմունային պատասխան։ Հետազոտությունը ցույց է տվել, որ երկաթի դեֆիցիտի դեպքում դրանք գրեթե չէին արտադրում ինտերֆերոն-գամմա՝ առանցքային հակավիրուսային ազդանշանը։ Խախտումը պահպանվում էր նույնիսկ սննդակարգը նորմալացնելուց հետո, ինչը վկայում է իմունային բջիջների ֆունկցիայի կայուն վնասման մասին։

Ազդեցությունը պարզվել է, որ տեղայնացված է թոքային հյուսվածքում. թոքերի T-բջիջները կորցնում էին վիրուսին լիարժեք արձագանքելու ունակությունը, մինչդեռ իմունային համակարգի այլ օղակները նորմալ են աշխատել։ Սա կարող է բացատրել, թե ինչու է երկաթի դեֆիցիտը կապված շնչառական վարակների նկատմամբ բարձր խոցելիության և ասթմայի ավելի մեծ ռիսկի հետ։

Հեղինակների խոսքով՝ երկաթի դեֆիցիտը սնուցման առավել տարածված խախտումներից մեկն է։ Թոքերի իմունիտետի վրա դրա ազդեցության ավելի խորը ըմբռնումը կարող է օգնել նոր դիետիկ և բժշկական ռազմավարություններ մշակելու հարցում՝ վիրուսային հիվանդությունների կանխարգելման համար։

Հետևեք NEWS.am Medicine-ին Facebook-ում և Twitter-ում