Դիետան կարող է ազդել կանանց մոտ ականջների աղմուկի առաջացման ռիսկի վրա. AJE

Ամերիկացի գիտնականները պարզել են, որ դիետան կարող է ազդել կանանց մոտ ականջներում աղմուկի առաջացման ռիսկի վրա: Պարզվել է, որ որոշ մթերքներ ընդունակ են ինչպես նվազեցնել, այնպես էլ մեծացնել քրոնիկական տինիտուսի առաջացման հավանականությունը: Աշխատությունը հրապարակվել է American Journal of Epidemiology (AJE) ամսագրում:

Գիտնականները վերլուծել են երկու խոշոր հետազոտությունների տվյալները՝ Nurses' Health Study և Nurses' Health Study II, որոնք ընդհանուր առմամբ ներառում են ավելի քան 113 հազար կնոջ հետազոտություններ: Դիտարկումը տևել է մի քանի տասնամյակ՝ 1980-ական թվականներից մինչև 2021-2022 թվականները, ինչը թույլ է տվել գնահատել սննդի և ականջներում կայուն աղմուկի առաջացման ռիսկի միջև երկարաժամկետ կապերը:

Վերլուծությունը ցույց է տվել, որ ընդհանուր առմամբ «առողջ» սննդակարգին հետևելը միշտ չէ, որ նվազեցրել է տինիտուսի ռիսկը։ Այնուամենայնիվ, առանձին մթերքներ զգալի ազդեցություն են ունեցել դրա վրա։ Այսպես, մրգերի մեծ քանակությամբ օգտագործումը կապված է եղել ռիսկի նվազման հետ՝ երկու խմբերում էլ։ Այն կանանց մոտ, ովքեր ամենաշատն են օգտագործել ամբողջահատիկավոր մթերքներ, ընդեղեն և շաքար պարունակող ըմպելիքներ, տինիտուսի առաջացման հավանականությունն ավելի բարձր է եղել։

Հետազոտողների հաշվարկներով՝ մրգերի ամենաշատ սպառում ունեցող կանանց մոտ ռիսկը ցածր է եղել մոտ 19%-ով՝ այն կանանց համեմատ, ովքեր ավելի հազվադեպ են մրգեր կերել։ Միևնույն ժամանակ, ամբողջական հատիկների բարձր սպառումը մեծացրել է ռիսկը մոտ 26%-ով, ընդեղենինը՝ 13%-ով, իսկ քաղցր ըմպելիքներինը՝ 12%-ով։ Նմանատիպ արդյունքներ են ստացվել նաև մասնակիցների այն ենթախմբում, որոնց համար հասանելի է եղել կյանքի ընթացքում աղմուկի ազդեցության վերաբերյալ տեղեկատվությունը։

Հեղինակներն ընդգծել են, որ ստացված տվյալները չեն նշանակում, թե պետք է հրաժարվել ամբողջահատիկավոր մթերքներից կամ ընդեղենից, որոնք սովորաբար համարվում են օգտակար։

«Մեր հետազոտությունը ցույց է տալիս, որ սննդակարգը կարող է ազդել քրոնիկական տինիտուսի զարգացման վրա, սակայն այս փուլում մենք խորհուրդ չենք տալիս խուսափել այն մթերքներից, որոնք ընդհանուր առմամբ  առողջ սննդակարգի բաղկացուցիչ մաս են հանդիսանում», — նշել են գիտնականները:

Նրանց խոսքով՝ արդյունքներն ընդգծում են սննդի և լսողության առողջության միջև փոխկապակցվածության բարդությունը և մատնանշում հետագա հետազոտությունների անհրաժեշտությունը, որոնք կօգնեն հասկանալ այս ազդեցության կենսաբանական մեխանիզմները և հստակեցնել սննդակարգի վերաբերյալ հանձնարարականները:

Հետևեք NEWS.am Medicine-ին Facebook-ում և Twitter-ում