Նոր ՊԷՏ տրասերը կարող է զգալիորեն բարելավել երիկամի քաղցկեղի ախտորոշումն ու ստադիավորումը

ՊԷՏ նոր տրասերը (ռադիոդեղագործական պատրաստուկ), որը թիրախավորում է կարբոանհիդրազ IX (CAIX) սպիտակուցը, բարձր արդյունավետություն է ցուցաբերել բացաբջջային երիկամաբջջային քաղցկեղի (ccRCC) հայտնաբերման գործում՝ ապահովելով ավելի բարձր զգայունություն և պատկերման ավելի լավ որակ՝ համեմատած ստանդարտ մեթոդների հետ: Կլինիկական վաղ հետազոտության արդյունքները ներկայացվել են Միջուկային բժշկության և մոլեկուլային պատկերման ընկերության (SNMMI) 2026 թվականի տարեկան կոնգրեսում:

Նախակլինիկական հետազոտություններում տրասերը ցուցաբերել է բարձր և կայուն կուտակում CAIX-ի բարձր էքսպրեսիայով ուռուցքներում՝ միաժամանակ արագորեն մաքրվելով շրջակա հյուսվածքներից: Պացիենտների մոտ պատրաստուկը հստակորեն տարբերակել է CAIX-դրական և CAIX-բացասական ուռուցքները, ինչը լիովին համապատասխանել է բիոպսիայի արդյունքներին:

Բացի այդ, 68Ga-RCC78-ը գերազանցել է լայնորեն կիրառվող 18F-ՖԴԳ (18F-FDG) ռադիոդեղագործական պատրաստուկին. կուտակումն առաջնային և մետաստատիկ օջախներում զգալիորեն ավելի բարձր է եղել, իսկ աղիներում ցածր ակտիվությունը թույլ է տվել ավելի հստակ պատկերել որովայնի խոռոչի ուռուցքային օջախները: «Ուռուցք-ֆոն» ավելի լավ հարաբերակցության շնորհիվ հետազոտողներին հաջողվել է հայտնաբերել լրացուցիչ մետաստատիկ օջախներ, որոնք չէին հայտնաբերվել պատկերման ստանդարտ մեթոդներով:

Ուհանի միացյալ հիվանդանոցի միջուկային բժշկության բաժանմունքի փոխտնօրեն, պրոֆեսոր Դա Վեյ Ցզյանի խոսքով՝ նոր տրասերը թույլ է տալիս ստանալ հիվանդության ավելի ճշգրիտ մոլեկուլային պատկերը:

«Մեր զոնդը էականորեն նվազեցնում է ֆոնային ազդանշանը որովայնի խոռոչում՝ միևնույն ժամանակ պահպանելով առավելագույնս բարձր կուտակումն ուռուցքում, ինչը կարող է կարևոր քայլ դառնալ բացաբջջային երիկամի քաղցկեղի անհատականացված ռադիոթերանոստիկայի ճանապարհին»,- նշել է նա:

Գիտնականներն աշխատում են նաև մոլեկուլի թերապևտիկ տարբերակի վրա՝ այն նշագրելով բուժիչ ռադիոիզոտոպներով, ինչը թույլ կտա ճառագայթումը թիրախային կերպով հասցնել ուղիղ ուռուցքային բջիջներին՝ նվազագույն ազդեցություն թողնելով առողջ հյուսվածքների վրա:

Չնայած տեխնոլոգիան գտնվում է կլինիկական գնահատման վաղ փուլում, հետազոտողներն արդեն պատրաստվում են ավելի լայնածավալ փորձարկումների: Մասնագիտացված կենտրոններում կլինիկական հետազոտություններին մասնակցությունը կարող է հասանելի դառնալ առաջիկա մեկ-երկու տարվա ընթացքում, մինչդեռ մեթոդի լայն կիրառումը կախված կլինի հետագա կարգավորող մարմինների հաստատումներից:

Հետևեք NEWS.am Medicine-ին Facebook-ում և Twitter-ում