Արևմտյան տիպի սննդակարգը և գենետիկան. գիտնականները կապ են հայտնաբերել տարեցների մոտ ուշադրության վատթարացման հետ

Արևմտյան տիպի սննդակարգը կարող է կապված լինել APOE գենի որոշակի տարբերակ կրող տարեց մարդկանց շրջանում ուշադրության ավելի արագ նվազման հետ: Դրա մասին են վկայում ավստրալացի գիտնականների փոքրածավալ հետազոտության արդյունքները, որոնք հրապարակվել են Nutrients հանդեսում:

Հետազոտողները 7,5 տարվա ընթացքում դիտարկել են մոտ 71 տարեկան 185 մարդու: Մասնակիցները կանոնավոր կերպով հանձնել են ճանաչողական թեստեր, իսկ նրանց սննդակարգը գնահատվել է հատուկ հարցաշարի միջոցով: Գիտնականներն առանձնացրել են սնուցման երկու հիմնական տիպ՝ արևմտյան սննդակարգ, որը ներառում էր ժամանակակից բարձր կալորիականությամբ օրաբաժնին բնորոշ ավելի շատ մթերքներ։

Գիտնականները հատուկ ուշադրություն են դարձրել APOE գենին: Դրա ε4 տարբերակը համարվում է Ալցհայմերի հիվանդության հայտնի գենետիկական ռիսկի գործոններից մեկը, թեև այս տարբերակի առկայությունն ինքնին չի նշանակում, որ մարդն անպայման կհիվանդանա:

Ընդհանուր առմամբ, հետազոտողները զգալի կապ չեն հայտնաբերել սննդակարգի և ճանաչողական գործառույթների վատթարացման միջև: Սակայն APOE ε4 կրողների շրջանում արևմտյան սննդակարգին ավելի մեծ հավատարմությունը կապված է եղել դիտարկման ժամանակահատվածում ուշադրության ցուցանիշների ավելի արագ նվազման հետ:

Այլ ճանաչողական գործառույթների (ներառյալ հիշողության) դեպքում արևմտյան տիպի սննդակարգի հետ զգալի կապ չի հայտնաբերվել: Ավելի «առողջ» սննդակարգը ճանաչողական գործառույթների փոփոխությունների հետ վիճակագրորեն նշանակալի կապ նույնպես ցույց չի տվել:

Հեղինակներն ընդգծում են, որ արդյունքը նախնական է: Երբ վերլուծությունից հանվեցին այն մասնակիցները, որոնց մոտ արդեն իսկ հետազոտության սկզբում կարող էին լինել ճանաչողական խանգարումներ, հայտնաբերված կապը թուլացավ և դադարեց վիճակագրորեն նշանակալի լինել:

Հետազոտողները նշում են նաև աշխատանքի մի քանի այլ սահմանափակումներ. հետազոտությունը ներառել է համեմատաբար փոքր թվով մասնակիցներ: Սննդակարգը գնահատվել է միայն դիտարկման սկզբում և ինքնահաշվետվությունների հիման վրա: Հետազոտության ընթացքում մասնակիցների մի մասը դուրս է մնացել գործընթացից: Չի կարելի բացառել հակառակ պատճառահետևանքային կապը. օրինակ՝ ճանաչողական գործառույթների արդեն իսկ առկա փոփոխությունները կարող էին ազդել սննդային սովորությունների վրա:

Ուստի գիտնականները հայտնաբերված կապը դիտարկում են որպես նախնական և կարծում են, որ անհրաժեշտ են ավելի մեծածավալ երկարաժամկետ հետազոտություններ և կլինիկական փորձարկումներ՝ նախքան կոնկրետ սննդակարգի և ճանաչողական առողջության միջև վերջնական եզրակացություններ անելը:

Հետևեք NEWS.am Medicine-ին Facebook-ում և Twitter-ում