Օրական ընդամենը մեկ բուռ ընկույզը կարող է 20%-ով նվազեցնել հիպերտոնիայի ռիսկը․ British Journal of Nutrition

Ընկուզեղենի կանոնավոր օգտագործումը կարող է կապված լինել հիպերտոնիայի ռիսկի նվազման հետ: Նման եզրահանգման են եկել գիտնականները՝ վերլուծելով ավելի քան 143 հազար մարդու տվյալներ: Հետազոտության արդյունքները հրապարակվել են «British Journal of Nutrition» ամսագրում:

Թիմն անցկացրել է ութ հեռանկարային հետազոտությունների համակարգված ակնարկ և մետաանալիզ, որոնց մասնակցել է 18-ից 87 տարեկան 143,380 մարդ: Մասնակիցներից 20,665-ի մոտ ախտորոշված է եղել հիպերտոնիա:

Պարզվել է, որ ամենաշատ ընկուզեղեն օգտագործած մարդկանց մոտ հիպերտոնիայի զարգացման ռիսկը մոտ 16%-ով ավելի ցածր է եղել, քան նրանց մոտ, ովքեր ամենաքիչն են այն օգտագործել:

Էլ ավելի նկատելի կապ է հայտնաբերվել ընկուզեղենի քանակի գնահատման ժամանակ: Գծային վերլուծության համաձայն՝ օրական հավելյալ 28 գրամ ընկուզեղենը կապված է եղել հիպերտոնիայի հարաբերական ռիսկի մոտ 20% նվազման հետ:

Այնուամենայնիվ, կախվածությունը, ամենայն հավանականությամբ, անսահմանափակ գծային չէ: Վերլուծությունը ցույց է տվել, որ օրական մոտ 25-30 գրամ ընկուզեղենից հետո պաշտպանիչ ազդեցությունը սկսում է հավասարվել: Առանձին մոդելում օրական 30-35 գրամ ընկուզեղենի օգտագործումը կապված է եղել ռիսկի մոտ 26% նվազման հետ:

Հեղինակները նշում են, որ ստացված արդյունքները համահունչ են նախորդ հետազոտություններին, որտեղ ընկուզեղենի օգտագործումը կապում էին զարկերակային ճնշման իջեցման և սիրտ-անոթային առողջության բարելավման հետ:

Հնարավոր ազդեցությունը գիտնականները կապում են ընկուզեղենում պարունակվող չհագեցած ճարպաթթուների, հանքանյութերի, բջջանյութի և այլ կենսաբանորեն ակտիվ միացությունների հետ: Այդուհանդերձ, տվյալ վերլուծությունը գնահատել է հենց վիճակագրական կապը, այլ ոչ թե դրա առաջացման կոնկրետ մեխանիզմները:

Միևնույն ժամանակ, հետազոտողները զգուշացնում են մի քանի սահմանափակումների մասին: Աշխատանքների մեծ մասում մասնակիցների սննդակարգը գնահատվել է ընդամենը մեկ անգամ, ինչը թույլ չի տալիս ճշգրիտ որոշել տարիների ընթացքում սննդի փոփոխությունները:

Բացի այդ, հետազոտությունները բավարար տեղեկատվություն չեն տրամադրել ընկուզեղենի կոնկրետ տեսակների և, որ ամենակարևորն է, դրանց աղի լինելու վերաբերյալ: Աղի ավելցուկն ինքնին ընդունակ է բարձրացնել զարկերակային ճնշումը:

Նաև ներառված հետազոտությունների թվում չեն եղել Աֆրիկայից և Հնդկական ենթամայրցամաքից ստացված աշխատանքներ, որի պատճառով արդյունքները չի կարելի ավտոմատ կերպով տարածել բոլոր բնակչության խմբերի վրա:

Չնայած այս սահմանափակումներին՝ հեղինակները ընկուզեղենի օգտագործման և հիպերտոնիայի ռիսկի նվազման միջև պատճառահետևանքային կապի հավանականությունը գնահատել են որպես «հավանական»՝ Քաղցկեղի հետազոտման համաշխարհային հիմնադրամի (World Cancer Research Fund) չափանիշներով:

Հետևեք NEWS.am Medicine-ին Facebook-ում և Twitter-ում