Մետֆորմինի ընդունումը կապվում է երկարատև COVID-19-ի և մահվան ռիսկի 53% նվազման հետ

Հետազոտության արդյունքները հրապարակվել են Journal of Medical Virology ամսագրում։ Գիտնականները համեմատել են 248-ական մարդուց բաղկացած երկու խումբ։ Առաջին խմբի մասնակիցները COVID-19-ի ախտորոշումից հետո վեց օրվա ընթացքում մետֆորմինի դեղատոմս են ստացել։

Իսկ ստուգիչ խմբի պացիենտներին նույն ժամանակահատվածում նշանակվել են այլ դեղամիջոցներ՝ ֆլուվօքսամին, ֆլուտիկազոն, իվերմեկտին կամ մոնտելուկաստ։

Վեց ամսվա կտրվածքով երկարատև COVID-19 կամ մահվան ելք է գրանցվել մետֆորմին ընդունած պացիենտների 4%-ի և ստուգիչ խմբի մասնակիցների 8,5%-ի մոտ։ Այսպիսով, բացարձակ տարբերությունը կազմել է 4,5 տոկոսային կետ, իսկ ռիսկի հարաբերական նվազումը՝ մոտ 53%։

Մետֆորմինը դեղամիջոց է, որը կիրառվում է նախադիաբետի և երկրորդ տիպի շաքարային դիաբետի բուժման նպատակով։ Երկու խմբերի մասնակիցների կեսից ավելին վարակված է եղել վիրուսի «օմիկրոն» տարբերակով։

Հեղինակները նշում են, որ ստացված արդյունքները համահունչ են բրիտանական ավելի վաղ արված հետազոտության տվյալներին։

Այդուհանդերձ, աշխատությունը հիմնված է էլեկտրոնային բժշկական քարտերի վերլուծության վրա և չի ապացուցում, որ հենց մետֆորմինն է ապահովել ռիսկի նվազումը։

Դեղամիջոցի ազդեցությունը հաստատելու համար անհրաժեշտ են լրացուցիչ հետազոտություններ, այդ թվում՝ կլինիկական փորձարկումներ։

Առայժմ այս արդյունքները չեն նշանակում, թե երկարատև COVID-19-ը կանխարգելելու համար պետք է ինքնակամ մետֆորմին ընդունել. դեղամիջոցն ունի հակացուցումներ, և այն պետք է նշանակի բացառապես բժիշկը։