Չափից ավելի շատ ուտելը կարող է վնասակար լինել առողջության համար. շատակերության հետեւանքով, հնավոր է, մարսողական համակարգի խնդիրներ առաջանան, իսկ օրգանիզմի դիմադրողականությունը՝ ընկնի՝ այդկերպ խոցելի դառանալով տարբեր վիրուսների եւ բակտերիաների զարգացման համար: Գիտությանը նույնիսկ  հայտնի են շատակերության հետեւանքով մահվան դեպքեր:

Իսկ ի՞նչ պետք է անել, եթե չափից շատ եք կերել եւ վատ եք զգում: Այս հարցի վերաբերյալ NEWS.am Medicine-ը զրուցել է գաստրոէնտերոլոգ Հայկ Մանասյանի հետ:

Եթե Դուք չափից շատ ուտելուցել հետո շատ վատ չեք զգում, պարզապես  սրտխառնոց ունեք կամ փորլուծությունից կամ փսխումից հետո ավելի լավ եք Ձեզ զգում, ապա, բժշկի խոսքով, պետք է անել հետեւյալը՝

1. Մեկ օր ոչինչ չուտել, խմել միայն ջուր կամ քիչ քանակությամբ հյութ: Բայց պետք է հաշվի առնել, որ բոլորին չի թույլատրվում քաղցած մնալ, ուստի պետք է հաշվի առնել օրգանիզմի առանձհատկությունները: Եթե մարդը չի կարող սոված մնալ՝ առողջական վիճակից ելնելով, ուրեմն ցանկալի է, որ նա խորհրդակցի բժշկի հետ եւ պարզի, թե ինչպես պետք է լուծել մարսողական համակարգի խանգարումը:

2. Հաջորդ օրվա ընթացքում անհրաժեշտ է օգտագործել միայն հեղուկ կերակուր: Կարելի է ուտել կարտոֆիլի խյուս, ջրիկ շիլա: Բժիշկը խորհուրդ է տալիս կերակուրը պատրաստել հարիչի օգնությամբ, որպեսզի ջրալի լինի:

3. Երրորդ օրը կարելի է ջրալի ճաշեր ուտել:

4.  Եթե 4-րդ օրը Ձեզ լավ եք զգում եւ թունավորման կամ մարսողական համակարգի  խանգարումներ չկան, կարելի է վերադառնալ սնման սովորական ռեժիմին:

Մանասյանը հիշեցրեց, որ վերոնշյալ թվարկումները կիրառելի են ոչ միայն չափից շատ ուտելու հետեւանքով առաջացած խնդիրները կարգավորելու համար, այլեւ մարսողական համակարգի այլ խախտումների դեպքում: Բայց եթե  Ձեր վիճակը չի լավանում, փսխումը եւ փորլուծությունը շարունակվում են այդ թվում՝ գիշերը, ուրեմն պետք է դիմել բժշկի: Նրա խոսքով՝ մասնագետի օգնությանը նաեւ պետք է դիմեն մարսողական խանգարում ունեցող այն տարեց անձինք, որոնք ճնշման կամ սրտանոթային համակարգի հետ կապված խնդիրներ ունեն: