Հայաստանում ՄԻԱՎ վարակակիրների մեծ մասը ոչ թե գեյեր կամ մարմնավաճառներ են, այլ աշխատանքային միգրանտներ

Ամբողջ աշխարհում ՄԻԱՎ –ով վարակվելու ռիսկային խումբ են համարվում սեքս բիզնեսի աշխատակիցները, տղամարդկանց հետ սեքսով զբաղվող տղամարդիկ, եւ ներարկվող թմրադեղեր օգտագործողները: Սակայն Հայաստանում ՄԻԱՎ-ը ոչ թե մարդկանց այս խմբերում է առավել տարածված, այլ աշխատանքային միգրանտների շրջանում:

Ինչպես լրագրողներին հայտնել է ՁԻԱՀ կանխարգելման հանրապետական կենտրոնի ղեկավար Սամվել Գրիգորյանը՝ ՄԻԱՎ –ով ապրող հայերի 73 տոկոսը սեզոնային աշխատանքային միգրանտներ են, եւ միայն 16 տոկոսն են վերոնշյալ «ստանդարտ» ռիսկի խմբերին պատկանող մարդիկ:

Ըստ ՁԻԱՀ կանխարգելման հանրապետական կենտրոնի տվյալների՝ ՄԻԱՎ վարակակիրների 64,4 տոկոսը վարակվել է հետերոսեքսուալ կոնտակտի ժամանակ, եւս 26.2 տոկոսը՝ ներարկվող թմրադեղեր գործածելու միջոցով: Բոլոր մնացած դեպքերում վարակը փոխանցվել է հոմոսեքսուալ սեռական կոնտակտի միջոցով, մորից երեխա եւ արյան միջոցով: Սակայն ձեռքբերում կարելի է համարել այն, որ 2001 թ. սկսած առայսօր Հայաստանում ոչ մեկը դոնորական արյան միջոցով ՄԻԱՎ-ով չի վարակվել:

Ուշագրավ է, որ վարակված միգրանտների մեծ մասը Ռուսաստանում են վարակվել: Ավելին՝ Ռուսաստանը տարածաշրջանում առաջին տեղն է զբաղեցնում ՄԻԱՎ վարակի տարածվածությամբ: Ինչպես հայտնեց Սամվել Գրիգորյանը, Ռուսաստանի բնակչության մոտավորապես 0.9 տոկոսը ու Ուկրաինայի բնակչության 0.8 տոկոսը վարակված է ՄԻԱՎ-ով: Իսկ Հայաստանում ՄԻԱՎ-ի տարածվածությունը մոտավորապես 0.2 տոկոս է:

Հիշեցնենք, որ ընդհանուր առմամբ 1998 թ. առայսօր Հայաստանում 2171 ՄԻԱՎ վարակակիր է գրանցվել, ՁԻԱՀ-ի 1127 դեպք, եւ դրանից մահացության 476 դեպք:

Հետևեք NEWS.am Medicine-ին Facebook-ում և Twitter-ում