Երեւանում տեղի է ունենում օստեոպորոզի խնդրի վերաբերյալ խոշոր քննարկում «4th Leadership Roundtable on Osteoporosis» վերնագրով: Քննարկմանը օստեոպորոզի առաջատար մասնագետներ են հավաքվել ինչպես Հայաստանից, այնպես էլ այլ երկրներից: Քննարկմանը ներկա են եղել նաեւ Հայաստանի առաջին տիկին Ռիտա Սարգսյանը եւ Հայաստանի առողջապահության նախարար Արմեն Մուրադյանը:
Ինչպես լրագրողներին պատմել է պրոֆեսոր Ջոն Բիլեզիկյանը (John P. Bilezikian), որը ղեկավարում է ԱՄՆ-ի Կոլումբիայի համալսարանի Բժշկական քոլեջի էնդոկրինոլոգիայի բաժանմունքը, այսօրվա դրությամբ օստեոպորոզը լուրջ խնդիր է ոչ միայն Հայաստանում, այլեւ աշխարհի բոլոր երկրներում: Օստեոպորոզի վերաբերյալ ճշգրիտ վիճակագրություն գոյություն չունի, սակայն հայտնի է, որ 50-ից մեծ կանանց կեսի մոտ առկա է օստեոպորոզի զարգացման եւ, որպես հետեւանք, ոսկրերի ջարդվելու վտանգ:
Մասնագետի խոսքով, այսօրվա քննարկումը չափազանց կարեւոր է, որովհետեւ կնպաստի այդ հիվանդության մասին տեղեկատվության տարածմանը ոչ միայն կառավարության ներկայացուցիչների, այլեւ հանրության շրջանում: Իսկ օստեոպորոզի վերաբերյալ գիտելիքներ ունենալը ծայրաստիճան կարեւոր է, որովհետեւ այդ գիտելիքները մարդկանց կօգնեն մանուկ հասակից ճիշտ սնվել եւ պահպանել ոսկրերի առողջությունը:
Օստեոպորոզի ռուսական ընկերակցության նախագահ Օլգա Լեսնյակն իր հերթին նշել է, որ Ռուսաստանում անցկացված համաճարակաբանական հետազոտությունների տվյալների համաձայն, 50-ից մեծ յուրաքանչյուր երրորդ կինը եւ չորրորդ տղամարդը ենթակա են կոտրվածքների նույնիսկ փոքր ազդեցության դեպքում, օրինակ՝ փռշտալու կամ ընկնելու: Հենց դրա համար էլ օստեոպորոզն ամբողջ աշխարհում լուրջ խնդիր է համարվում, որի մասին պետք է տեղեկություններ տարածել եւ որի զարգացումն անհրաժեշտ է կանխել:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր