«Nature Neuroscience» ամսագրում հրապարակված Մայոյի կլինիկայի հետազոտության համաձայն, բջիջները, որոնք հանդես են գալիս որպես կենտրոնական նյարդային համակարգը վնասից պաշտպանելու առաջին գիծ, նույնպես որոշակի դեր են խաղում անզգայացումից հետո ուղեղի արթնացման գործում: Այս բացահայտումը կարող է օգնել ճանապարհ հարթել անզգայացման հետևանքների վերացմանն ուղղված նորարարական մեթոդների համար:

Թմրաքնից դուրս գալիս հիվանդների ավելի քան մեկ երրորդը կարող է զգալ կամ ուժեղ քնկոտություն կամ հիպերակտիվություն, կողմնակի ազդեցություն, որը կոչվում է զառանցանք: Մայոյի համալսարանի գիտնականները պարզել են, որ ուղեղի հատուկ իմունային բջիջները, որոնք կոչվում են միկրոգլիա, կարող են պաշտպանել նեյրոնները անզգայացման հետևանքներից, որպեսզի արթնացնեն ուղեղը:

«Սա առաջին անգամն է, երբ մենք նկատում ենք՝ ինչպես է միկրոգլիան ուժեղացնում նեյրոնային ակտիվությունը՝ ֆիզիկապես գործարկելով ուղեղային շղթաները»,- ասում է Մայո կլինիկայի նյարդաբան Լոն Չժուն Վուն՝ հետազոտության ավագ հեղինակը:

Հետազոտողները դիտարկել են, թե ինչպես են միկրոգլիաները սեպվում նեյրոնների և արգելակող սինապսների միջև՝ ճնշելով նեյրոնների ակտիվությունը թմրաքնի ժամանակ: Միկրոգլիան, ըստ երևույթին, փորձում է պաշտպանել նեյրոնները, որպեսզի հակազդի հանգստացնող գործողությանը:

Թմրաքնից դուրս գալիս զառանցանք կամ գրգռվածություն զգացող հիվանդները  կարող են զգալ   նաև հիպերակտիվություն կամ ծայրահեղ անաշխուժություն: Հետազոտողները կարծում են, որ հիպերակտիվությունը կարող է լինել այն բանի արդյունք, որ միկրոգլիան չափազանց ուժեղ է սեպվում նեյրոնների և արգելակող սինապսների միջև:

«Եթե մենք կարողանանք ուսումնասիրել միկրոգլիայի դերը տարբեր ֆիզիոլոգիական վիճակներում, ինչպիսին է քունը, ապա կարող ենք կիրառել այս գիտելիքը՝ բարելավելու հիվանդների խնամքը կլինիկական պայմաններում», - ասում է հետազոտության առաջատար հեղինակ և Մայո կլինիկայի ավագ գիտնական Կոիչիրո Հարուվական։