Բացահայտվել է կենդանիների ծերացման պատճառը:  Այս բացահայտման էությունը բջջի ներսում կորիզի եւ միտոքնդրիումների միջեւ կապ ապահովող մոլեկուլյար իրադարձությունների հաջորդականությունն է: Երբ այդ կապերը քանդվում են, ծերացման պրոցեսն արագանում է:

Գիտնականները լաբորատոր ծեր մկների ներմուծել են բնական եղանակով մարդու օրգանիզմում արտադրված մոլեկուլ, դրանով իսկ վերականգնելով կապերը: Ստացված հյուսվածքների նմուշներն ունեին ավելի երիտասարդ մկների բնորոշ հիմնական կենսաբանական նշանները:

«Ծերացման պրոցեսը մենք համեմատում ենք ամուսնական զույգի հետ՝ երբ նրանք երիտասարդ են, շատ լավ են շփվում, բայց ժամանակի ընթացքում, երկար տարիներ կողք կողքի ապրելուց հետո, կապը խզվում է»,-  ասաց  Հարվարդի բժշկական դպրոցի  գենետիկայի պրոֆեսոր, հետազոտության ավագ հեղինակ Դեվիդ Սինկլերը: «Եւ նույն կերպ, վերականգնելով կապերը, կարելի է լուծել այս խնդիրը», - նշաց նա։

Հետազոտությունը Հարվարդի բժշկական դպրոցի,  ծերացման խնդիրների ազգային ինստիտուտի եւ Ավստրալիայի Սիդնեյի,  Հարավային Ուելսի նոր համալսարանի համատեղ ծրագիրն է, հաղորդում է Newsmax Health-ը:

Միտոքոնդրիումներին հաճախ անվանում են  կենսաբանական պրոցեսների համար անհրաժեշտ քիմիական էներգիա ստեղծող  բջիջների «էլեկտրոկայաններ»: Մեր բջիջներում ապրող եւ սեփական ոչ մեծ գենոմներն ունեցող այս ինքնավար օրգանելլաները հիմնական դերն են խաղում ծերացման պրոցեսում:  Երբ նրանք շարքից դուրս են գալիս, առաջանում են տարբեր հիվանդություններ, այդ թվում Ալցհեյմերը եւ շաքարախտը:

Հետազոտողներն իհարկե կասկածանքով են վերաբերվում այն մտքին, որ հնարավոր է շրջել ծերացման պրոցեսը, հիմնականում գերակշռող այն տեսության պատճառով, որ ծերացումը միտոքոնդրիումների ԴՆԹ-ի մուտացիաների արդյունք է, իսկ մուտացիաները վերականգնել հնարավոր չէ:

Դեռեւս անհայտ պատճառներով ծերացման ժամանակ NAD կոչվող քիմիական նյութի ելակետային մակարդակն իջնում է: Սինկլերը եւ նրա հետազոտական խումբը բացահայտեցին, որ այս կորուստը նվազեցնում է բջջի էներգիա ստեղծելու ունակությունը, ինչի պատճառով էլ ծերացման նշաններն ու հիվանդություններն ակնհայտ են դառնում:

Հետազոտողները բացահայտեցին, որ  բջիջներում NAD  ստեղծող էնդոգեն նյութի  ներմուծման միջոցով, նրանք կարողացան վերականգնել փչացած ցանցը եւ արագ վերականգնել կապն ու միտոքոնդրիումների ֆունկցիան: Եթե միացումները բավականին վաղ են վերականգնվում, ծերացման որոշ նշաններ կարող են հետ զարգանալ:

Ուսումնասիրելով երկու տարեկան մկների մկանները, ում մեկ շաբաթվա ընթացքում NAD-ի արտադրության համար հատուկ նյութ էին տալիս, հետազոտողները  ստուգեցին նրանց ինսուլինակայունությունը, բորբոքումները եւ մկանների կորուստը: Բոլոր երեք դեպքերում էլ  մկների հյուսվածքները համապատասխանում էին 6- ամսական մկների հյուսվածքներին:  Մարդկային տարիների վերածելու դեպքում դա նույնն է, ինչ 60-ամյա մարդը դառնա 20-ամյա: