Օսակայի Մետրոպոլիտեն համալսարանի գիտնականները պարզել են, որ սերին կոչվող ամինաթթուն կարող է խանգարել օրգանիզմում Clostridium perfringens բակտերիաների սպորների առաջացմանը: Այս հարուցիչը հաճախ դառնում է սննդային թունավորման պատճառ: Հետազոտության արդյունքները հրապարակվել են Anaerobe բժշկագիտական հանդեսում։

Ըստ գիտնականների՝ Clostridium perfringens մանրէն տարածված է կենդանիների աղիներում և հողում։ Clostridium perfringens-ը բազմանում է թթվածնի ցածր պարունակությամբ միջավայրերում, մասնավորապես՝ կաթսայում պահվող սննդամթերքում: Սպորների ձևավորման ժամանակ արտազատվող տոքսինները ներթափանցելուց հետո կարող են առաջացնել փորլուծություն և որովայնի ուժեղ ցավ: Սակայն մինչ այժմ սպորների առաջացման մեխանիզմը բավականաչափ ուսումնասիրված չէ։

Օսակայի Մետրոպոլիտեն համալսարանի անասնաբուժական գիտությունների բարձրագույն ​​դպրոցի դոցենտ Մայո Յասուգիի թիմն ուսումնասիրել է, թե ինչպես են ամինաթթուները մասնակցում Clostridium perfringens սպորների արտադրության մեջ: Գիտնականները ստեղծել են 21 մշակութային միջավայր, որտեղ նրանցից 20-ը զրկվել են մարդու օրգանզիմի սպիտակուցները կազմող ամինաթթուներից մեկից։ Դա ցույց տվեց, որ ամինաթթու սերինը ճնշում է բակտերիաների բջջային պատի վերափոխումը, որն անհրաժեշտ է սպորի վերածվելու համար:

Պրոֆեսոր Յասուգին նշել է, որ հետազոտության ժամանակ արձանագրվել է մեկ ամինաթթվի կողմից սպոր առաջացնող անաէրոբ բակտերիաների արգելման առաջին դեպքը։

Ապագայում գիտնականները հույս ունեն ավելի լավ հետազոտել սերինի արգելակման ունակությունը, Clostridium perfringens-ով սննդային թունավորման պաթոգեն մեխանիզմները և մարդու մարմնում պաթոգեն միկրոօրգանիզմների գոյատևման ռազմավարությունը: Նրանք հույս ունեն, որ նոր գիտելիքները նոր ուղիներ կբացեն թունավորումների դեմ պայքարի արդյունավետ եղանակների մշակման համար։