Մաքմասթեր համալսարանի հետազոտողները արյան մեջ փոքր մոլեկուլներ են հայտնաբերել, որոնք վաղ տարիքում կարող են ազդել երեխաների զարգացման վրա և ցույց են տվել, թե ինչպես են սննդակարգը, վաղ կենսական փորձը և աղիքների առողջությունն ազդում երեխայի աճի և նրա ճանաչողական կարողությունների վրա:

Մաքմասթեր համալսարանի թիմը, բրազիլացի գիտնականների հետ համագործակցությամբ, վեց ամսականից հինգ տարեկան ավելի քան 5000 երեխաներից վերցված արյան նմուշների ոչ նպատակային նյութափոխանակային վերլուծություն են կատարել Բրազիլիայում մանկական սննդի ազգային  հետազոտության շրջանակներում:

Գիտնականները պարզել են, որ մի քանի մետաբոլիտներ՝ փոքր մոլեկուլներ, որոնք մարդու նյութափոխանակության և մանրէների ֆերմենտացման կողմնակի արտադրանք են և հայտնի են որպես ուրեմիկ տոքսիններ, հակադարձ համեմատական են զարգացման արդյունքների հետ:

Պրոֆեսոր Ֆիլիպ Բրից-Մաքքիբինը և նրա թիմը կիրառել են բարձր արդյունավետության մոտեցում ոչ նպատակային մետաբոլիտների պրոֆիլավորման համար՝ լայնածավալ ուսումնասիրությունները դարձնելով ավելի արագ և հասանելի:

Սա թույլ է տվել նրանց հայտնաբերել անսպասելի մետաբոլիտներ, որոնք կապված են նորածինների և մանուկների զարգացման հետ: Նրանց վերլուծության արդյունքները հրապարակվել են eLife ամսագրում։ Հետազոտողները կենտրոնացել են արյան մետաբոլիտների վրա, որոնք փոխկապակցված են ճանաչողական զարգացման վաղ փուլերի հետ՝ օգտագործելով զարգացման գործակից (DQ) կոչվող ցուցանիշը:

Առողջապահության համաշխարհային կազմակերպությունն օգտագործում է այս ցուցանիշը՝ պարզելու, թե արդյոք երեխաները համապատասխանում են իրենց տարիքին սոցիալական և ճանաչողական զարգացման հարցում:

Գիտնականների այս նոր մոտեցումը հանգեցրել է մի քանի կենսաբանորեն ակտիվ մետաբոլիտների բացահայտմանը, որոնք առավել հաճախ կապված են երիկամների քրոնիկ հիվանդության հետ, ինչը թույլ է տալիս ենթադրել, որ դրանց մակարդակի նույնիսկ աննշան աճը կարող է նպաստել վաղ մանկության տարիքում բորբոքմանը և զարգացման հապաղմանը: