Միջազգային գիտնականների խումբը պարզել է, որ 65-ից բարձր կանանց մոտ սեռական խնդիրներն այնքան հաճախ են հանդիպում, որքան միջին տարիքի կանանց մոտ, բայց նրանց մոտ ավելի քիչ անհանգստություն են առաջացնում։ Աշխատանքը հրապարակվել է Menopause ամսագրում։

Թեև տարիքի հետ սեռական ակտիվությունը նվազում է՝ այն ամբողջությամբ չի անհետանում։ Նախորդ հետազոտությունների համաձայն՝ միջին տարիքի կանանց ավելի քան 75%-ը սեքսը համարում է կարևոր, իսկ 65-ից բարձր կանանց 37%-ը և 85-ից բարձր կանանց 10%-ը շարունակում են սեռականորեն ակտիվ լինել։ Սակայն տարեց կանանց սեռական առողջությունը քիչ է ուսումնասիրված, իսկ օգնության համար դիմելը՝ հազվադեպ է։

3500 սեռականորեն ակտիվ կանանց ընդգրկած հետազոտության մեջ՝ գիտնականները համեմատել են 65 և բարձր տարիքի մասնակիցների տվյալները 50-64 տարեկան կանանց տվյալների հետ։ Պարզվել է, որ տարեց կանայք ավելի քիչ են բողոքում սեռական ցանկության և զգայունության կորստից, բայց միևնույն ժամանակ նույնքան հաճախ են բախվում կանանց սեռական դիսֆունկցիայի հետ՝ խանգարումներ, որոնք պահպանվում են առնվազն վեց ամիս և խանգարում են հաճույք ստանալ մտերմությունից։ Տարբերությունն այն է, որ ավելի մեծ տարիքի կանայք ավելի քիչ են զգում էմոցիոնալ անհանգստություն այս խնդիրների պատճառով։

Հեղինակները ենթադրում են, որ դա կարող է պայմանավորված լինել տարիքային փոփոխությունները ընդունելու ավելի մեծ պատրաստակամությամբ կամ սեռական կյանքից ավելի ցածր սպասելիքներով։ Հնարավոր է նաև, որ տարեց կանայք պարզապես ավելի հազվադեպ են քննարկում ինտիմ դժվարությունները և տեղյակ չեն բուժման հասանելի մեթոդների մասին։

Հետազոտողները նշում են, որ արդյունքները ընդգծում են սեռական առողջության մասին խոսելու անհրաժեշտությունը կյանքի բոլոր փուլերում և աջակցություն են առաջարկում բոլոր տարիքի կանանց, այլ ոչ թե միայն նրանց, ովքեր գտնվում են դաշտանադադարի շրջանում։