Մանհայմի համալսարանական բժշկական կենտրոնի գիտնականները պարզել են, որ կանացի էստրոգեն հորմոնը պաշտպանում է երիկամների բջիջները ֆերոպտոզից, որը երկաթից կախված կարգավորվող բջջային մահվան մի ձև է: Հետազոտության արդյունքները հրապարակվել են Nature բժշկագիտական  հանդեսում:

Բժիշկները վաղուց գիտեին, որ կանայք ավելի քիչ են հակված սուր երիկամային անբավարարության, քան տղամարդիկ. այդ փաստը հաստատվել է համաճարակաբանական տվյալներով 1940-ական թվականներից ի վեր: Սակայն այդ պաշտպանիչ ազդեցության մեխանիզմը երկար ժամանակ մնում էր անհասկանալի:

Էգ և արու մկների վրա կատարված փորձերը ցույց են տվել, որ կանանց հիմնական սեռական հորմոնը արգելափակում է ֆերոպտոզը: Սա բացատրում է, թե ինչու է պաշտպանիչ ազդեցությունը թուլանում դաշտանադադարի ժամանակ, երբ դրա արտադրությունը նվազում է: Հիմնական դերը խաղում են էստրոգենն ինքը և դրա հիդրօքսիլացված ածանցյալները, մասնավորապես՝ 2-հիդրօքսիէստրադիոլը. դրանք բարդ պաշտպանիչ կասկադ են առաջացնում, որը ներառում է գենոմային և ոչ գենոմային մեխանիզմներ:

Գիտնականները պարզաբանել են, որ էստրոգենը գործում է երկու ձևով: Այն ոչ միայն գործում է որպես բնական «պատնեշ» ֆերոպտոզի դեմ, այլև կապվում է բջիջներում գտնվող հատուկ ընկալիչի հետ՝ «միացնելով» օրգանիզմի պաշտպանական ռեակցիաները: Այս ռեակցիաները նվազեցնում են հյուսվածքը վնասող վնասակար մոլեկուլների մակարդակը և բջջային թաղանթի կարևոր տարրերը մնում են անվնաս։

Հեղինակները կարծում են, որ արդյունքները օգնում են բացատրել տղամարդկանց և կանանց մոտ երիկամային հիվանդության ռիսկի տարբերությունները և նոր թերապևտիկ մոտեցումների ուղղություն են բացում։

«Մեր արդյունքները կարող են կարևոր լինել նաև սրտաբանության մեջ: Դրանք ենթադրում են, որ ֆերոպտոզը կարևոր դեր է խաղում սեռական տարբերությունների մեջ այնպիսի հիվանդությունների դեպքում, ինչպիսին են սրտի կաթվածը և ուղեղի կաթվածը, որոնցից կանայք, որպես կանոն, ավելի լավ են պաշտպանված, քան տղամարդիկ», - նշել է կենտրոնի 5-րդ բժշկական կլինիկայի տնօրեն և հետազոտության համահեղինակ, պրոֆեսոր Անդրեաս Լինկերմանը։