Նույնիսկ նորմալ թոքային ֆունկցիա ունեցող նախկին և ներկա ծխողների մոտ օրգանիզմի բարձր «փխրունությունը» կապված է շնչառական ծանր սրացումների և մահվան ռիսկի կտրուկ աճի հետ։ Նման եզրակացության են հանգել Brigham and Women's Hospital-ի և Հարվարդի բժշկական դպրոցի հետազոտողները։ Աշխատանքը հրապարակվել է Aging-US ամսագրում։

Փխրունությունը համախտանիշ է, որի դեպքում օրգանիզմը կորցնում է ֆիզիոլոգիական պաշարները և ավելի վատ է հաղթահարում բեռնվածությունն ու հիվանդությունները։ Ամենից հաճախ այն հանդիպում է տարեց մարդկանց մոտ և դրսևորվում է ուժի, դիմացկունության և ֆիզիկական ակտիվության մակարդակի նվազեցմամբ, ինչը մարդուն ավելի խոցելի է դարձնում նույնիսկ համեմատաբար թեթև հիվանդությունների նկատմամբ։

Հետազոտությանը մասնակցել է ավելի քան 2,6 հազար մարդ՝ 45-80 տարեկան, ովքեր առնվազն 10 տարի ծխելու փորձ ունեն։ Դիտարկման երկրորդ փուլում բոլոր մասնակիցներին բաժանել են երեք խմբի՝ «ամուր», «նախապես փխրուն» և «փխրուն» և մոտ երեք տարվա ընթացքում հետևել են նրանց առողջությանը։ Այդ ընթացքում գրանցվել են շնչառության կտրուկ վատթարացման և մահացության դեպքերը։

Պարզվել է, որ «փխրուն» մասնակիցների մոտ շնչառական ծանր կամ հաճախակի նոպաների հավանականությունը 3-5 անգամ ավելի բարձր է, քան «ամուր» մասնակիցների մոտ, ընդ որում, այս ազդեցությունը դիտվել է նույնիսկ թոքերի քրոնիկ հիվանդությունների բացակայության դեպքում։ «Նախապես փխրունության» փուլում գտնվող մարդիկ նույնպես բարդությունների բարձր ռիսկեր են ունեցել։

Գիտնականները նաև այս խոցելիության կենսաբանական հաստատումն են հայտնաբերել. «փխրուն» հետազոտվողների մոտ օրգանիզմի ծերացումն արագացված տեմպերով է ընթանում, ինչը ցույց է տվել DunedinPACE ԴՆԹ թեստը։ Սա վկայում է այն մասին, որ փխրունությունը արտացոլում է ավելի խորը տարիքային փոփոխություններ։

Հեղինակները կարծում են, որ փխրունության պարզ թեստերը կարող են դառնալ ծխողների և նախկին ծխողների մոտ խնդիրների վաղ հայտնաբերման արդյունավետ գործիք՝ թույլ տալով ժամանակին կանխարգելում իրականացնել և նվազեցնել մահացությունը։