Հյուսիսարեւմտյան համալսարանի (ԱՄՆ) գիտնականները պարզել են, որ լեւետիրացետամ հակացնցումային դեղամիջոցը կարող է կանխել ուղեղում թունավոր սպիտակուցային բշտերի առաջացումը, որը Ալցհեյմերի հիվանդության հիմնական նշաններից մեկն է: Հետազոտության արդյունքները հրապարակվել են Science Translational Medicine (STM) ամսագրում:

Հետազոտողները պարզել են, որ ամիլոիդի ամենավտանգավոր ձեւը՝ բետա-ամիլոիդ 42 սպիտակուցը, կուտակվում է բջիջների միջեւ ազդանշանների փոխանցմանը մասնակցող նեյրոնների սինապտիկ բշտիկներում: Ենթադրվում է, որ այդ գործընթացը առաջացնում է թունավոր ագրեգատներ, որոնք վնասում են ուղեղը:

Լեւետիրացետամը, որը FDA-ի (ԱՄՆ սննդամթերքների եւ դեղամիջոցների որակի վերահսկման վարչություն) կողմից հաստատվել է ավելի քան 20 տարի առաջ էպիլեպսիայի բուժման համար, խանգարում է այս մեխանիզմին: Դեղամիջոցը դանդաղեցնում է սպիտակուցների մշակումը նեյրոնների ներսում՝ այդպիսով կանխելով բետա-42 ամիլոիդի առաջացումը:

Ազդեցությունը փորձարկվել է կենդանիների մոդելների, մարդկային նեյրոնների եւ Դաունի համախտանիշ ունեցող մարդկանց ուղեղի հյուսվածքի նմուշների վրա՝ խումբ, որն ունի վաղ Ալցհեյմերի հիվանդության չափազանց բարձր ռիսկ: Բոլոր դեպքերում դեղամիջոցը նվազեցրել է թունավոր սպիտակուցի արտադրությունը: Ավելին, կլինիկական տվյալների վերլուծությունը ցույց է տվել, որ լեւետիրացետամ ընդունող Ալցհեյմերի հիվանդություն ունեցող պացիենտների կոգնիտիվ խանգարումն ավելի դանդաղ է զարգացել։

Հեղինակներն ընդգծել են, որ դեղամիջոցի պոտենցիալ արդյունավետությունը հնարավոր է միայն հիվանդության վաղ փուլերում՝ մինչեւ արտահայտված ախտանիշների ի հայտ գալը։ Դեմենցիայի զարգացման դեպքում ուղեղի պաթոլոգիական փոփոխությունները մեծ մասամբ դառնում են անդառնալի։