նախընտրելի դարձնել
Գիտնականները պիթոնների՝ մեծ օձերի արյան մեջ հայտնաբերել են հատուկ քիմիական միացություն, որը զգալիորեն նվազեցնում է ախորժակը։ Կոլորադոյի Բոուլդերի համալսարանի գիտնականների և այլ համալսարանների գործընկերների հետազոտության արդյունքները հրապարակվել են Natural Metabolism բժշկագիտական հանդեսում։
Հետազոտությունը ցույց է տալիս, որ այս սողունների արյան բաղադրիչներն օգնում են նրանց նյութափոխանակորեն առողջ մնալ նույնիսկ ուտելիքների միջև երկար ժամանակահատվածներից հետո՝ մի հայտնագործություն, որը կարող է ճանապարհ հարթել ճարպակալման և ավելորդ քաշի դեմ նոր թերապիաների համար։
Միացությունը, որը գիտնականները անվանել են pTOS, պիթոնների մարմիններում արտադրվում է մեծ քանակությամբ ուտելիքներից հետո և, ինչպես ցույց են տվել մկների վրա լաբորատոր փորձարկումները, արդյունավետորեն ճնշում է քաղցը։
Փորձարկվող կրծողները, որոնց տրվել է pTOS, մի քանի շաբաթվա ընթացքում ավելի քիչ են կերել և միաժամանակ քաշ են կորցրել. մեկ փորձի ընթացքում մկները 28 օրվա ընթացքում նիհարել են մոտ 9%-ով։ Այս մոլեկուլի և առկա քաշի կորստի համար նախատեսված միջոցների միջև հիմնական տարբերությունը դրա մեխանիզմն է. շատ հայտնի դեղամիջոցներ, ինչպիսիք են GLP-1-ի վրա հիմնվածները (օրինակ՝ Վեգովի և այլն), գործում են ստամոքսի դատարկումը դանդաղեցնելով և առաջացնելով կողմնակի ազդեցություններ, ինչպես օրինակ սրտխառնոցը: Սակայն, նախնական տվյալներով, pTOS-ն ազդում է ուղեղի ախորժակի կենտրոնի վրա՝ առանց էական կողմնակի ազդեցությունների կամ նկատելի մկանային կորստի:
Հետազոտողներն ընդգծում են, որ այս բնական միացությունն ինքնին մի գիշերվա ընթացքում դեղամիջոց չի դառնա. անհրաժեշտ են էլ ավելի շատ հետազոտություններ, ներառյալ՝ մարդկանց վրա կլինիկական փորձարկումներ, որպեսզի որոշվի դրա անվտանգությունը, արդյունավետությունը և համապատասխան դեղաչափերը:
Այնուամենայնիվ, այն փաստը, որ նմանատիպ մոլեկուլներ արդեն հայտնաբերվում են մարդկանց մեջ շատ փոքր քանակությամբ, և որ դրանց մակարդակը բարձրանում է ուտելուց հետո, լավատեսություն է առաջացնում դրանց հնարավոր կիրառման վերաբերյալ. հնարավոր է, սա կհանգեցնի դեղերի նոր դասի մշակմանը, որոնք ավելի անվտանգ և ավելի լավ հանդուրժելի են, քան շատ դեղամիջոցներ:
Կենդանական աշխարհի բնական մեխանիզմները դեղամիջոցներ ստեղծելու համար օգտագործելու գաղափարը նոր չէ. օրինակ, Գիլա հրեշի թույնից ստացված GLP-1-անման միացություններն ավելի վաղ ճարպակալման դեմ ժամանակակից դեղամիջոցների հիմք են եղել: Այս նոր հայտնագործությունը կարող է լինել հաջորդ քայլը ճարպակալման բուժման զինանոցն ընդլայնելու գործում, մի հիվանդություն, որը ազդում է միլիոնավոր մարդկանց վրա ամբողջ աշխարհում և մնում է ամենադժվար բուժելիներից մեկը:
