նախընտրելի դարձնել
Գայլուկում (հմուլ) պարունակող միացություններն ի վիճակի են բարելավել ճարպերի նյութափոխանակությունն օրգանիզմում՝ իջեցնելով տրիգլիցերիդների և «վատ» խոլեստերինի մակարդակը՝ միաժամանակ բարձրացնելով «լավ» խոլեստերինի մակարդակը։
Նման եզրակացության են հանգել Ժեշովի համալսարանի գիտնականները։ Հետազոտության արդյունքները հրապարակվել են Nutrients հանդեսում։
«Գայլուկը (Humulus lupulus L.) նախ և առաջ հայտնի է որպես գարեջրի բաղադրիչ, սակայն պարունակում է մի շարք կենսաբանորեն ակտիվ նյութեր, որոնք կարող են ազդել նյութափոխանակության և NF-κB, Nrf2, AMPK, MAPK, PPAR և PI3K/AKT/mTOR ազդանշանային ուղիների վրա։
Այդ նյութերն ի վիճակի են նվազեցնել տրիգլիցերիդների՝ արյան մեջ շրջանառվող ճարպերի կոնցենտրացիան, ինչպես նաև ցածր խտության լիպոպրոտեինների մակարդակը, որոնք հաճախ կոչվում են «վատ» խոլեստերին»,- նշել են գիտնականները։
Հեղինակների տվյալներով՝ այդ ազդեցությունները կապված են ճարպերի մշակման և օրգանզիմի էներգետիկ հաշվեկշռի կարգավորման մեջ ներգրավված ֆերմենտների և ընկալիչների վրա ազդեցության հետ։
Գայլուկի որոշ բաղադրիչներ ընդունակ են միաժամանակ նվազեցնել բորբոքումը և օքսիդատիվ սթրեսը՝ վիճակ, որի դեպքում ռեակտիվ թթվածնային տեսակները կուտակվում են բջիջներում և հյուսվածքների վնասման հանգեցնում։
Բացի դրանից, մի քանի փորձերի արդյունքում նկատվել է ինսուլինի նկատմամբ զգայունության բարելավում։ Դա նշանակում է, որ օրգանզիմի բջիջներն ավելի լավ են արձագանքում ինսուլին հորմոնին և ավելի արդյունավետորեն օգտագործում են արյան մեջ գլյուկոզը։
Այդ մեխանիզմի խափանումը համարվում է 2-րդ տիպի շաքարախտի զարգացման հիմնական գործոն։ Հետազոտությունները միաժամանակ նշել են ճարպի կուտակման նվազում, հատկապես սննդային անբավարարության դեպքերում։
Հեղինակներն ընդգծում են, որ նման հետազոտությունները գլխավորապես կենտրոնանում են լաբորատոր փորձերի և փոքր կլինիկական դիտարկումների վրա։ Գայլուկի արդյունավետությունն իրական աշխարհում կարող է կախված լինել չափքանակից, սպառման եղանակից և օրգանզիմի առանձնահատկություններից։
Ընդսմին, ստացված տվյալները ենթադրում են, որ այդ բույսը կարող է համարվել նյութափոխանակության առողջությունը պահպանելու պոտենցիալ բնական բաղադրիչ։
