նախընտրելի դարձնելՀայաստանում առողջության համընդհանուր ապահովագրության համակարգի ներդրման առաջին վեց ամսում հատկացված միջոցների զգալի մասն ուղղվել է վիրահատությունների ֆինանսավորմանը․ դրանց թվում եղել են ինչպես թանկարժեք, այնպես էլ պակաս ծախսատար, բայց պացիենտների համար կարևոր այլ վիրահատություններ։ Այս մասին հայտնել է Առողջության համընդհանուր ապահովագրության հիմնադրամի գլխավոր տնօրենի ժամանակավոր պաշտոնակատար Սամվել Խարազյանը։
Խարազյանի խոսքով՝ խոսքն առաջին հերթին այնպիսի վիրահատությունների մասին է, որոնք թույլ են տալիս ոչ միայն փրկել մարդկանց կյանքը, այլև էապես բարելավել դրա որակը։ Մասնավորապես, համակարգի միջոցներով ֆինանսավորվել են սրտի վիրահատությունները, այդ թվում՝ սրտի բաց վիրահատական միջամտությունները, աորտոկորոնար շունտավորումը, ինչպես նաև սրտի և անոթների ստենտավորումը։
Խարազյանը նշել է, որ սրտի և անոթների վիրահատությունները դարձել են համակարգի աշխատանքի առաջին ամիսների ամենապահանջված ուղղություններից մեկը։ Նա խոստովանել է, որ նման ցուցանիշներն սպասելի էին, քանի որ երկրում բազմաթիվ քաղաքացիներ են եղել, որոնց հիվանդությունների բուժումը հետին պլան է մղված եղել։
Նա նշել է, որ դեռևս 2025 թվականի վերջին, երբ ապահովագրության մասին օրենքը քննարկվում էր Ազգային ժողովում, հիմնադրամն արդեն ստանում էր քաղաքացիների բազմաթիվ դիմումներ։ Հիմնականում դիմել են 65-ն անց անձինք, որոնք սպասում էին համակարգի ներդրմանը՝ հատկապես սրտի անհրաժեշտ վիրահատություններն իրականացնելու համար։ Ապահովագրության մեկնարկից հետո այդ կուտակված պահանջարկը սկսել է բավարարվել մարդկանց։
Այժմ դիմումների հոսքը սկզբնական շրջանի համեմատ որոշ չափով նվազել է, այդուհանդերձ, նման վիրահատությունների ծավալը կշարունակի զգալի մնալ, քանի որ սիրտ-անոթային հիվանդությունները առաջատար տեղ են զբաղեցնում թե՛ Հայաստանում, թե՛ ամբողջ աշխարհում։
Բացի այդ, ֆինանսավորվող ծառայությունների ցանկում ընդգրկվել են կոնքազդրային հոդի էնդոպրոթեզավորումը, կատարակտի վիրաբուժական բուժումը և պացիենտների առողջության վերականգնմանն ուղղված այլ միջամտություններ։
Ինչպես նշել է Խարազյանը, այս վիրահատություններից շատերը մարդկանց հնարավորություն են տալիս վերագտնել շարժունակությունը, վերականգնել տեսողությունը և ազատվել առօրյա կյանքում նրանց խանգարող լուրջ խնդիրներից։
Նրա խոսքով՝ բուժումից հետո պացիենտները լիարժեք ինքնադրսևորվելու հնարավորություն են ստանում ինչպես առօրյայում, այնպես էլ մասնագիտական գործունեության մեջ։ Հիմնադրամի ղեկավարն ընդգծել է, որ նման բժշկական միջամտությունները նպաստում են ոչ միայն քաղաքացիների կյանքի որակի բարձրացմանը, այլև երկարաժամկետ հեռանկարում կարող են դրականորեն ազդել մահացության, հիվանդացության և հաշմանդամության ցուցանիշների վրա։
«Վեց ամիսը չափազանց կարճ ժամկետ է բարեփոխման արդյունքների վերջնական գնահատման համար, սակայն առաջին տվյալներն արդեն իսկ վկայում են նկատելի առաջընթացի մասին»,- հայտարարել է նա։
