Տղամարդիկ, որոնք տաբատի գրպանում բջջային հեռախոս են կրում կամ էլ օրական մեկ ժամ դրանով խոսում են, ավելի հաճախ են բախվում բեղմնավորության հետ կապված խնդիրների, զգուշացնում են  Technion University-ի գիտնականները:

106 տղամարդու մասնակցությամբ հետազոտությունը ցույց է տվել, որ այն տղամարդիկ, որոնք  խոսում են լիցքավորվող հեռախոսով, ավելի քիչ ունեն ողջ եւ ակտիվ սպերմատոզոիդներ: Նման խնդրի են բախվում նաեւ այն տղամարդիկ, որոնք գիշերը հեռախոսն իրենց մոտ են պահում: Ավելին, այն տղամարդիկ, որոնք մեկ ժամվա ընթացքում հեռախոսով խոսում են, երկու անգամ ավելի հաճախակի են սերմնահեղուկի որակի հետ կապված խնդիրներ ունենում, քան նրանք, որոնք քիչ են խոսում: 

Հետազոտությունը նաեւ ցույց է տվել, որ   47 տոկոսը այն տղամարդկանց, որոնք սովոր են հեռախոսը աճուկից  50 սմ-ից պակաս հեռավորության վրա պահել, բախվել է սպերմատոզոիդների հետ կապված լուրջ խնդիրների:  Համեմատության համար, սպերմատոզոիդների ցածր քանակություն եւ որակ հանդիպում է մոլորակի տղամարդկանց մոտավորապես 11 տոկոսի մոտ: 

Խնդիրն ավելի շուտ էլեկտրամագնիսական ակտիվությունն ու ջերմությունն են, որ ճառագում է հեռախոսը. այդ ամենը սպանում է սպերմատոզոիդներին, զգուշացնում են գիտնականները: 

«Եթե Դուք արդեն մի տարի է` փորձում եք երեխա ունենալ եւ ոչինչ դուրս չի գալիս, գուցե դրա համար մեղավոր են բջջային հեռախոսի հետ կապված Ձեր սովորույթները», - նշել է պրոֆեսոր Մարթ Դիրնֆելդը: 

Տղամարդկանց, որոնք ցանկանում են հայր դառնալ, գիտնականները խորհուրդ են տալիս հեռախոսով չխոսել, եթե այն լիցքավորման է դրված, իսկ առօրյա կյանքում այն հնարավորինս հեռու  (գոնե 50 սմ-ով)  պահել աճուկի հատվածից:

Այդ հետազոտության մասին հաղորդում է Reproductive BioMedicine ամսագիրը: