Օրական 6 գավաթ սուրճի օգտագործումը նվազեցնում է ցրված սկլերոզի վտանգը: Սթոքհոլմի Karolinska Institute-ի, Մերիլենդի Ջոնս Հոփքինսի համալսարանի եւ Բերկլիի Կալիֆորնիական համալսարանի գիտնականները պնդում են, թե մարդու առողջության համար սուրճի օգտակարության ապացույցները գնալով ավելի համոզիչ են դառնում: 

Հետազոտողները պարզել են, որ օրական ավելի քան   900 մլ սուրճի օգտագործումը  (6 գավաթի համարժեքը) 30 տոկոսով նվազեցնում է ցրված սկլերոզի վտանգը: Այդպիսին են միանգամից երկու հետազոտության արդյունքները, որոնց ցրված սկլերոզով տառապող   3 000 մարդ  է մասնակցել եւ այդ հիվանդությունը չունեցող եւ վերահսկիչ խմբում ներառված մոտ 4 000 մարդ: 

Հետազոտության ընթացքում մասնակիցներին հարցրել են, թե ինչ ծավալով են սուրճ օգտագործում եւ երբվանից է այդ ըմպելիքն առկա նրանց սննդակարգում: Հետո գիտնականները որոշել են հետազոտության յուրաքանչյուր մասնակցի սննդակարգում սուրճի ծավալը մինչեւ ցրված սկլերոզի ախտանիշների ի հայտ գալը եւ դրանց ի հայտ գալու ընթացքում: Այդ տվյալները համադրել են առողջ մարդկանց խմբի վերաբերյալ տեղեկությունների հետ: 

Հետազոտություններից մեկի ընթացքում սուրճի օգտագործումը կապված էր ցրված սկլերոզի վտանգի նվազման հետ ինչպես հիվանդության ախտանիշների ի հայտ գալու պահին, այնպես էլ դրանց առաջացման  5-10 տարվա ընթացքում: Օրական ավելի քան  900 մլ սուրճ խմողների մոտ հիվանդության զարգացման վտանգը նվազում է  28 -30 տոկոսով նրանց համեմատ, որոնք սուրճ չեն խմել: Երկրորդ հետազոտության արդյունքում մոտավորապես նման թվեր են ստացվել`   26-31 տոկոս նվազում նրանց մոտ, ովքեր օրական 948 մլ սուրճ էր օգտագործում: 

Փորձագետների կարծիքով, սուրճը նյարդապաշտպանիչ հատկանիշներ ունի, այն ճնշում է բորբոքային ռեակցիան եւ խթանում է կենտրոնական նյարդային համակարգը: