նախընտրելի դարձնել
Rutgers University-ի գիտնականները միջոց են գտել գլխուղեղին առողջ նեյրոններ պատվաստելու, որոնք կկարողանան փոխարինել վնասված նյարդային բջիջները եւ բարելավել նեյրոդեգեներատիվ հիվանդություններով, օրինակ` Ալցհայմերի հիվանդությամբ կամ Պարկինսոնի հիվանդությամբ տառապող հիվանդների վիճակը:
Գիտնականները Փրաբհաս Մոհգեի գլխավորությամբ բազմապոտենտ ցողունային բջիջներ են առանձնացրել եւ հասել են նեյրոններում դրանց շերտավորմանը. բջիջներն աճել են եռաչափ պոլիմերային հիմնակմախքներում, որոնցից յուրաքանչյուրի չափը չէր գերազանցում 100 մկմ-ն:
Հետո գիտնականները ստացված նեյրոնները ներմուծել են մկների գլխուղեղ: Փորձարկումները ցույց են տվել, որ բջիջներն անջատվել են հիմնակմախքներից եւ սկսել են գործել գլխուղեղի այլ նեյրոնների հետ միասին:
Հեղինակները նշում են, որ առաջին անգամը չէ, որ նեյրոնները գլխուղեղ մտցնելու փորձեր են ձեռնարկվում, սակայն այս դեպքում գիտնականներին հաջողվել է 100 անգամ մեծացնել փոխպատվաստված բջիջների գոյատեւման կարողությունը: Այլ մեթոդների օգտագործման պարագայում բջիջների գոյատեւման կարողությունը չէր գերազանցում 1 տոկոսը:
Գիտնականներն առայժմ վստահ չեն, թե նեյրոնների նման փոխպատվաստումը կազդի մարդկանց վրա, սակայն նրանք նախատեսել են շարունակել իրենց փորձարկումները: Գուցե մի օր այդ մեթոդի շնորհիվ հնարավոր լինի օգնել Ալցհայմերի եւ Պարկինսոնի հիվանդություններով տառապողներին:
