Լիստերիոզը սուր վարակիչ հիվանդություն չէ, սակայն որոշ դեպքերում կարող է մահացու ելք ունենալ: Որպես կանոն, դա տեղի է ունենում լիստերիայի` գլխուղեղ ներթափանցման դեպքում, NEWS.am Medicine-ի թղթակցի հետ զրույցում նշել է կենսաբան Հայկ Ալեքսանդր Էսկանդարյանը` ախտածինների հետազոտման ոլորտում ձեռքբերումներին նվիրված դասախոսությունների շարքի շրջանակում:  

Նրա խոսքով, ամենից հաճախ վարակումը տեղի է ունենում բանջարեղենի եւ մրգերի միջոցով, ինչպես նաեւ չեռացրած եւ չպաստերիզացված կաթ եւ դրանցից պատրաստված մթերքներ օգտագործելիս: Լիստերիոզի առումով վտանգավոր են նաեւ սառեցված կիսաֆաբրիկատները, հում ձվերը, կիսահում միսը: Բարձր ջերմաստիճանի պայմաններում լիստերիաները մեռնում են: 

Կենսաբանն ուշադրություն է հրավիրել այն բանին, որ չափահաս մարդիկ ուժեղ իմունային համակարգի  շնորհիվ կարող են չզգալ հիվանդության ախտանիշները: Սակայն երեխաները, որոնց իմունային համակարգը դեռ չի ամրացել, հեշտությամբ «տրվում են» լիստերիոզին: «Դա ինչ-որ առումով նույնիսկ լավ է, որովհետեւ վարակն արագ իրեն զգացնել է տալիս», - նշել է Էսկանդարյանը:  

Առավելագույն վտանգը, նշել է նա, լիստերիոզը ներկայացնում է հղի կանանց համար:   «Հղիության վաղ փուլերում մանրէն ներթափանցում է ընկերքով եւ պտղի մահվան պատճառ է դառնում, իսկ ավելի ուշ` ներքին օրգանների վարակման: Դեղամիջոցներն առավել հաճախ անզոր են լինում վարակի առջեւ:  Նման երեխաների ողջ մնալու շանսերը բարձր չեն», – ասել է նա։