Արեւմտյան Աֆրիկայի երկրներից մեկում՝ Սիերա-Լեոնեում Էբոլա արեւադարձային վիրուսի դեմ պայքար մղող առաջնակարգ բժիշկներից մեկը՝ 39-ամյա Շեյխ Ումար Խանը, ով երկրի առողջապության նախարարության կողմից ազգային հերոսի կոչման է արժանացել՝ քաջարի աշխատանքի համար, այլեւս վարակված է հեմոռագիկ հիվանդությամբ, հաղորդում է NewsMax Health-ը:
Նշենք, որ միայն Սիերա-Լեոնեում 206 մարդու մահվան պատճառ դարձած վիրուսի դեմ որեւէ պատվաստանյութ դեռեւս չի մշակվել. վարակվածների 90 տոկոսին մահվան ելք է սպառնում:
Առողջապահության համաշխարհային կազմակերպության տվյալներով, Աֆրիկայի ամենաաղքատ երկրներից երեքում՝ Գվինեայում, Սիերա-Լեոնեում եւ Լիբերիայում առավել լայն տարածում գտած հեմոռագիկ տենդը, ընդհանուր առմամբ, հասցրել է ավելի քան 600 մարդու կյանք խլել:
Այդուհանդերձ, վիրուսաբան Շեյխ Ումար Խանին հաջողվել է ավելի քան 100 մարդու կյանք փրկել՝ մահաբեր հիվանդության ճիրաններից: Սիերա-Լեոնայի առողջապահության նախարար Միատտա Կարգբոն խոստացել է ամեն ինչ անել՝ ազգային հերոսի կյանքը փրկելու համար:
Բժիշկը մեկ անգամ չէ մտահոգություն հայտնել, որ վարակվելու վտանգի է ենթարկվում: «Պետք է ասեմ, որ վախենում եմ՝ կյանքիս համար: Հիվանդի հետ անմիջական շփման ընթացքում հնարավոր չէ արդյունավետ պաշտպանիչ միջոցառումներ ձեռնարկել», - նշել է նա հունիս ամսին՝ Ռոյթերս գործակալությանը տված հարցազրույցի ժամանակ:
Մասնավորապես, երեք օր առաջ Խանի հետ միասին աշխատող երեք բուժքույրների մահվան մասին էր տեղեկություն հաղորդվել:
Էբոլա հեմոռագիկ տենդն առաջին անգամ Գվինեայում՝ ընթացիկ տարվա փետրվար ամսին է ախտորոշվել: Հիվանդության ախտանշաններն են փորլուծությունը, փսխումը, ինչպես նաեւ արտաքին եւ ներքին արյունահոսությունը:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր