Հեմոֆիլիայի համաշխարհային ֆեդերացիան հաստատել է Հեմոֆիլիայի կենտրոնի համար նախատեսված 96 հազար շվեյցարական ֆրանկ ընդհանուր արժողությամբ դրամաշնորհային ծրագիրը: Այս ծրագիրը, ինչպես նշում է ՀՀ ԱՆ-ին կից Արյունաբանական կենտրոնի ղեկավար Սմբատ Դագբաշյանը, թույլ կտա հեմոֆիլիայով ծնված երեխաների բուժման գործընթացին նոր որակ հողորդել:
Ինչպես նշեց Սմբատ Դագբաշյանը, ծրագրի շրջանակներում Արյունաբական կենտրոնի համար նոր սարքավորումներ են ձեռք բերվելու: Մասնավորապես, արյան մակարդման, ինչպես նաեւ հոդերի սոնոգրաֆիկ հետազոտման սարքավորումներ:
Ծրագրի շրջանակներում նախատեսված են նաեւ մարզերում ապրող հեմոֆիլիայով հիվանդների բնակարաններ մասնագետների այցելություններ: Այսպիսի այցելությունները մարդկանց անհրաժեշտ տեղեկություններ կտրամադրեն եւ թույլ կտան ավելին իմանալ ինչպես հիվանդության, այնպես էլ բարդացումների կանխարգելման մասին:
Վերջին հանգամանքը, ինչպես նշում է մասնագետը, կարեւոր է, քանի որ մահվան դեպքերի վերլուծությունը ցույց է տալիս, որ, չնայած նրան, որ մահվան դեպքերի թիվը հաջողվել է կրճատել (արձանագրվել է ընդամենը երկու դեպք), դրանց պատճառը մնում է նույնը՝ հեմոֆիլիայով տառապողների տեղափոխումը Երեւանում գտնվող Արյունաբանական կենտրոն:
«Դրամաշնորհային այս ծրագիրը թույլ կտա նոր որակ հաղորդել Հայաստանում հեմոֆիլիայի բուժմանը», - նշեց Սմբատ Դագբաշյանը՝ հավելելով, որ հիվանդության բուժումն արդեն իսկ գտնվում է բավականին բարձր մակարդակի վրա՝ շնորհիվ մեր տարածաշրջանի համար բացառիկ համագործակցության Հեմոֆիլիայով հիվանդների ասոցիացիայի եւ Հեմոֆիլիայի կենտրոնի միջեւ:
Հետևեք NEWS.am Medicine-ին Facebook-ում և Twitter-ում
ամիս
շաբաթ
օր