Բրազիլիայում մոծակներին սպանող բիլբորդներ են հայտնվել: Մշակողները հույս ունեն, որ այդ բիլբորդները կօգնեն ոչնչացնել Զիկա վիրուս եւ այլ հիվանդություններ տարածող միջատներին:
Mosquito Killer Board-ը ածխաթթու գազ եւ կաթնային թթու է արտազատում, այդպիսով նմանակելով մարդկային քրտինքը եւ շնչառությունը եւ գրավելով միջատներին մոտավորապես երկուս ու կես կմ շառավղով: Դեպի սարքը թռչող միջատները ներծծվում են հատուկ մեխանիզմի միջոցով, որտեղ էլ հետագայում մեռնում են ջրազրկումից:
Մշակողները չեն նախատեսել բիլբորդների վրա գովազդի տեղադրում. ֆլուորեսցենտային լամպերի միջոցով լուսավորվող վահանակի վրա այժմ գրված է, որ «այս բիլբորդը ամեն օր Զիկա վիրուսը տարածող հարյուրավոր մոծակներ է ոչնչացնում»: Բացի այդ, սատկած մոծակները շատ լավ երեւում են սարքի ներսում, ինչը մարդկանց մատնացույց է անում այդ սարքի արդյունավետությունը:
Առայժմ մշակողները Ռիո-դե-Ժանեյրոյում նման ընդամենը երկու վահանակ են տեղադրել, սակայն նրանք հույս ունեն, որ այդ սարքերը կտեղադրվեն նաեւ այլ քաղաքներում եւ երկրներում:
Ճիշտ է, որոշ մասնագետներ թերահավատորեն են վերաբերվում սարքին: Սաութհեմփթոնի համալսարանից Քրիս Ջեքսոնը նշել է, որ այդ բիլբորդները հետաքրքիր մշակում են, բայց եթե մեծ քանակությամբ մոծակների գրավեն, դա էականորեն կմեծացնի հավանականությունն այն բանի, որ նրանք կխայթեն անցորդներից որեւէ մեկին:
Հետևեք NEWS.am Medicine-ին Facebook-ում և Twitter-ում