Սնունդը ոչ միայն քաղցը հագեցնելու միջոց է, այլեւ մեր օրգանիզմի համար շինանյութ: Լրագրողների հետ հանդիպմանը դիետոլոգ Վարդանուշ Պետրոսյանը նշել է, որ հենց սննդից է կախված, թե մենք ինչ տեսք ունենք եւ ինչպես ենք զգում:
Մասնագետը մի քանի պատճառ է նշել, թե ինչու է պետք հետեւել առողջ սննդակարգի` վնասակար մթեքների սահմանափակ օգտագործմամբ (ինչպիսիք են շաքարը, աղը, վերամշակված սնունդը) եւ սննդակարգում բանջարեղենի, մրգերի, ամբողջական հատիկներից մթերքների գերակշռությամբ:
1. Առողջության պահպանումը
Մասնագետի խոսքով, ճիշտ սնունդը կարող է օգնել պահպանելու առողջությունը: Ավելին, դրանից է կախված նաեւ մեր կյանքի որակը:
Հայաստանում այսօր շատ բարձր է ոչ վարակիչ հիվանդություններից մահացությունը, ինչպիսիք են սրտանոթային հիվանդությունները, դիաբետը եւ հիպերտոնիան: Դրանց ի հայտ գալու մեջ մեծ դեր է խաղում հենց անառողջ սնունդը` սննդակարգում բանջարեղենի եւ մրգերի պակասը, աղի եւ շաքարի ավելցուկը: Վնասակար մթերքներից հրաժարումը կարող է օգնել նվազեցնել այդ բոլոր հիվանդությունների զարգացման ռիսկը: Ավելին, առողջ սնունդը, ինչպես նշել է դիետոլոգը, կարող է օգնել նվազեցնել այն դեղերի քանակը, որոնք անհրաժեշտ են մարդուն:
2. Գեղեցկության պահպանում
Սննդամթերքները շինանյութ են, որն օրգանիզմն օգտագործում է մեր մաշկի, մազերի, եղունգների վերականգնման համար: Եթե մենք վիտամիններով եւ հանքանյութերով հարուստ մթերքներ ենք ուտում, մեր օրգանիզմը լավ նյութ է ստանում, ինչի շնորհիվ պահպանում է մեր գեղեցկությունը:
3. Մտավոր գործունեություն
Մեր սննդից կախված է ոչ միայն մեր ֆիզիկական մարմնի վիճակը, այլեւ մտավոր գործընթացները, որոնք տեղի են ունենում նրանում: Վարդանուշ Պետրոսյանը նշել է, որ օգտակար սնունդը մարդուն ավելի խելացի է դարձնում, օգնում է կենտրոնանալ, բարելավում է ուշադրությունը, հիշողությունը եւ կենտրոնացումը:
Դիետոլոգը նաեւ նշել է, որ կարեւոր է ոչ միայն այն, թե ինչ ենք ուտում, այլեւ, թե մենք ինչպես ենք անում դա: Սննդի ընդունմանը անհրաժեշտ է ամեն օր բավարար ուշադրություն հատկացնել, ցանկալի է ուտել հաճելի ընկերակցությամբ եւ առանց շտապելու:
Հետևեք NEWS.am Medicine-ին Facebook-ում և Twitter-ում