Այսօր շատերը Մեծ պահքին հետեւում են ոչ թե հոգեւոր մաքրության հասնելու համար, այլ միայն որովհետեւ ուզում են նիհարել: Բայց հնարավո՞ր է նիհարել Մեծ պահքի ժամանակ: Այս մասին NEWS.am Medicine-ի թղթակցի հարցին՝ հարցին պատասխանեց դիետոլոգ Վարդանուշ Պետրոսյանը:
Դիետոլոգն առաջին հերթին նշեց, որ չնայած այսօր շատերը պահքն օգտագործում են նիհարելու համար, նիհարելը Մեծ պահքի նպատակ չէ: «Մեծ պահքի ավանդույթը ծնվել է քրիստոնեության արշալույսին, երբ մարդկությունն ավելորդ քաշի խնդիր չի ունեցել»,- հիշեցրեց Վարդանուշ Պետրոսյանը:
Դիետոլոգի խոսքով՝ Մեծ պահքի ժամանակ, թերեւս, կնիհարեն այն մարդիկ, ովքեր գիրանում են չափից շատ խորոված, քաբաբ եւ ալկոհոլ օգտագործելու հետեւանքով:
Մյուսների համար գրեթե անհնար կլինի նիհարել: Ինչո՞ւ:
Բանն այն է, որ, դիետոլոգի խոսքով, բուսական սնունդն այնքան արագ չի հագեցնում, որքան կենդանական ծագման ուտելիքը: Ուստի մարդը կարող է շատ ուտել ու ավելի շատ կալորիա ստանալ, քան պահքից առաջ:
Բացի դրանից՝ մեր երկրում ամռանն ու ձմռանը մրգերի ու բանջարեղենի մեծ ընտրություն չկա, այդ պատճառով պահք պահող մարդիկ սկսում են հիմնականում հաց, մակարոն, բրինձ եւ կարտոֆիլ օգտագործել: «Այդ մթերքները շատ դատարկ ածխաջրեր են պարունակում, որոնք կարող են գիրության պատճառ դառնալ»,- նշեց դիետոլոգը:
Մսից հրաժարվելը նույնպես չի նպաստում նիհարելուն, քանի որ անյուղ միսն ամենադիետիկ մթերքներից է, մինչդեռ վերը նշված բոլոր մթերքները բավական կալորիական են:
Այդ պատճառով, եզրափակեց դիետոլոգը, Մեծ պահքի ժամանակ մեծ է ոչ միայն չնիհարելու, այլեւ գիրանալու հավանականությունը:
Հետևեք NEWS.am Medicine-ին Facebook-ում և Twitter-ում