University of Virginia School of Medicine-ի գիտնականները առանցքային գործոն են հայտնաբերել, որը կարեւոր դեր է խաղում ինչպես քաղցկեղային հիվանդությունների զարգացման, այնպես էլ Էբոլայի տենդով վարակման գործում: Խոսքը HOPS համալիրի մասին է, որը վեց մոլեկուլից է բաղկացած:
Այն բացահայտվել է մոտ 30 տարի առաջ, բայց բջիջներում նրա դերը մինչեւ վերջ չի ուսումնասիրվել: Գիտնականներն այժմ պարզել են, որ HOPS-ի առկայությունն անհրաժեշտ է քաղցկեղային բջիջների աճի եւ կենսունակության համար:
Քրիստոֆեր Սթրոուպն ու իր գործընկերները ենթադրել են, որ ուղղորդված գործողությամբ դեղամիջոցները, որոնք ազդում են անմիջապես HOPS-ի վրա, կօգնեն կանգնեցնել ուռուցքային գործընթացի առաջընթացը, իսկ քաղցկեղային բջիջներն ավելի խոցելի կդարձնեն հակաքաղցկեղային դեղամիջոցների ազդեցության առաջ:
Գիտնականները նաեւ պարզել են, որ HOPS-ի համալիրն անհրաժեշտ է բջիջների` Էբոլայի տենդի վիրուսով վարակման համար: Այսպիսով գիտնականները ենթադրում են, որ HOPS-ի վրա ազդող դեղամիջոցները կօգնեն ոչ միայն հաղթահարել քաղցկեղը, այլեւ Էբոլայի վիրուսը: HOPS-ի վրա հարձակվող դեղամիջոցը կարող է առաջին նման միջոցներից մեկը լինել: Ճիշտ է, նման դեղամիջոց դեռ պետք է ստեղծվի:
Առայժմ գիտնականները, ուսումնասիրելով խմորասնկի բջիջներում HOPS-ի դերը, սկսել են պարզաբանել մարդկային բջիջներում այդ համալիրի աշխատանքի մեխանիզմը:
Հետևեք NEWS.am Medicine-ին Facebook-ում և Twitter-ում