Դանիական դեղագործական H Lundbeck A/S ընկերությունը հայտնել է, որ անհաջողությամբ է ավարտվել Ալցհայմերի հիվանդության դեմ պայքարի համար նախատեսված իդալոպիրդին դեղամիջոցի կլինիկական հետազոտությունների ուշ փուլը, դանիացի հետազոտողները դեղամիջոցը մշակել էին ճապոնական Japan's Otsuka Pharmaceutical Co Ltd դեղագործական ընկերության հետ միասին:
Գիտնականները հայտնել են, որ դեղամիջոցի փորձարկվող երկու չափաբաժինն էլ քիչ արդյունավետ էին եւ չեն դանդաղեցրել այդ հիվանդությամբ տառապող հիվանդների մոտ մտածողական կարողությունների նվազումը: Հետազոտողներն օգտվել են մտածողական կարողությունների գնահատման ADAS-cog սանդղակից. հիվանդներին առաջարկվել է մի շարք կարճ թեստեր կատարել, որոնցում մասնակիցները պետք է մտապահեին եւ վերարտադրեին բառերի ցուցակներ, առարկաների անուններ տային, պարզ երկրաչափական ֆիգուրներ պատկերեին: Այդ եւ այլ թեստերի համար հիվանդներին մոտ մեկ ժամ էր անհրաժեշտ լինում, նրանք այդ թեստերն անցնում էին ինչպես բուժման կուրսը սկսելուց առաջ, այնպես էլ դրանից հետո:
Կլինիկական փորձարկումների ավելի վաղ փուլերում ցույց էր տրվել, որ իդալոպիրդինն անվտանգ է եւ հիվանդները լավ են տանում դա, իսկ II փուլի արդյունքները բավականին ոգեշնչող էին հետազոտողների համար: Ընդ որում, արդեն հայտնի է դարձել, որ հետագա փորձարկումների ընթացքում գիտնականները հիվանդներին ավելի ցածր չափաբաժին էին տալիս լյարդի վրա դեղամիջոցի հնարավոր թունային ազդեցության պատճառով:
Դեղագործական ընկերության ներկայացուցիչները նշել են, որ հետազոտությունները կշարունակվեն, իսկ արդյունքները կհրապարակվեն 2017 թվականի առաջին եռամսյակում:
Հետևեք NEWS.am Medicine-ին Facebook-ում և Twitter-ում