Տղամարդկանց առնական է դարձնում տեստոստերոն հորմոնը, որը պատասխանատու է մարմնի վրա մազերի աճի, մկանայի զանգվածի կառուցման, սերմնաբջիջների նորմալ քանակի պահպանման, ոսկրերի առողջության եւ իհարկե՝ լիբիդոյի համար: Ներկայացնում ենք մի քանի մթերքներ, որոնք օրգանիզմում բարձրացնում են տղամարդկային հորմոնի մակարդակը:
Նռան հյութ
Մեծ թվով գիտնականների կարծիքով՝ նռան հյութն օգնում է լավացնել սերմնաբջիջների որակը եւ տեստոստերոնի մակարդակի բարձրացման հաշվին լիբիդոյի աճ է ապահովում: Հյութը հարուստ է նաեւ С, В1, В2, А, Е եւ РР վիտամիններով, որոնց շնորհիվ այն իմունիտետի վրա բարենպաստ ազդեցություն է ունենում, դրական է ազդում նաեւ մաշկի, մազերի եւ եղունգների վիճակի վրա: Հայտնի է նաեւ, որ նռան հյութի կանոնավոր օգտագործումը նպաստում է հեմոգլոբինի մակարդակի բարձրացմանը:
Արքայախնձոր
2016 թվականին European Journal of Sport Science ամսագրում հրապարակված հետազոտությամբ պարզվել է, որ արքայախնձորի մեջ պարունակվող բրոմելայն ֆերմենտը օգնում է պահպանել տեստոստերոնի խտությունը, նվազեցնում է հոգնածությունը եւ վերականգնում է մարզումների ժամանակ վնասված մկանները: Սպորտով զբաղվող տղամարդկանց խորհուրդ է տրվում իրենց սննդակարգի մեջ արքայախնձոր ներառել:
Սոխ եւ սխտոր
Սոխը եւ սխտորը նվազեցնում են սթրեսի կորտիզոլ հորմոնի մակարդակը, ինչը դրականորեն է ազդում տեստոստերոնի ցուցանիշների վրա: Այս մթերքները, ինչպես մաղադանոսը, նեխուրը եւ սամիթը, ուժեղացնում են լիբիդոն եւ պոտենցիան:
Համեմունքներ
Կոճապղպեղը եւ դարչինը լավացնում են մարսողությունը, նյութափոխանակությունը, նաեւ դրական ազդեցություն ունեն սերմնաբջիջների որակի վրա եւ բարձրացնում են տեստոստերոնի մակարդակը:
Միս եւ ձուկ
Առողջության եւ հորմոնների նորմալ մակարդակի պահպանման համար տղամարդկանց նաեւ խորհուրդ է տրվում միս (հավի եւ տավարի) եւ ձուկ օգտագործել, նաեւ ձու: Դրանց մեջ պարունակվող սպիտակուցները եւ ճարպերը անհրաժեշտ են հորմոնալ համակարգի բնականոն աշխատանքի համար:
Հարկ է նշել, որ տղամարդկանց առողջությունը պահպանելու համար խորհուրդ է տրվում ոչ միայն ճիշտ սնվել, այլեւ կանոնավոր զբաղվել սպորտով, քանի որ ֆիզիկական ակտիվությունը բարենպաստ է ներգործում տղամարդկային հորմոնների սինթեզի եւ տղամարդկանց վերարտադրողական առողջության վրա:
Հետևեք NEWS.am Medicine-ին Facebook-ում և Twitter-ում