Երկու կանայք, որոնք վաղ դաշտանադադարի արդյունքում անպտուղ են դարձել, արյան պլազմայի ներարկումից հետո կարողացել են հղիանալ: Եթե այս գործողության արդյունավետությունը հաստատվի նաեւ հետագայում, կանայք հնարավորություն կունենան վերարտադրողական ֆունկցիան ավելի երկար պահպանել: Դա նաեւ հույս կտա վաղ դաշտանադադարի խնդրի բախված կանանց:
39 եւ 40 տարեկան կանայք ձվարանների եւ արգանքի ներարկում են ստացել հունական Աթենքի Genesis Athens Clinic բուժկենտրոնում: Գիտնականները ենթադրում են, որ արյան պլազմայի ներարկումը երիտասարդացնում է վերարտադրողական համակարգը: Հիմա կանանցից մեկն արդեն հղիության 6-րդ ամսում է, իսկ երկրորդը, ցավոք, առաջին եռամսյակում վիժել է:
Այս գործողությունն արդեն 180 կանայք են անցել. նրանցից ոմանք ցանկացել են հղիանալ, իսկ մյուսներին երիտասարդացնող ներարկումներն անհրաժեշտ են եղել դաշտանադադարի տհաճ նախանշանները վերահսկելու համար: Կանանց մեծ մասի մոտ հետազոտության ժամանակ արդեն դաշտանադադարի փուլ է եղել, սակայն գործողությունն օգնել է ավելի լավ հաղթահարել դաշնադադարը՝ վերականգնելով հորմոնների մակարդակը:
Հետազոտության այս փուլում ստացված արդյունքները բժիշկները խոստումնալից են համարում: Նրանք հույս ունեն, որ ապագայում կհաջողվի դրանք հաստատել նաեւ կլինիկական հետազոտության ընթացքում: Միաժամանակ, արյան պլազմայի ներարկման արդյունքում ձվարանների եւ արգանդի երիտասարդացման մեխանիզմն առայժմ մինչեւ վերջ հասկանալի չէ:
Հետևեք NEWS.am Medicine-ին Facebook-ում և Twitter-ում