Իսրայելցի բժիշկները փրկել են տղամարդուն, որը կուլ էր տվել ատամի խոզանակը: Բժիշկները հաճախ են ստիպված լինում առարկաներ հանել, որոնք հիվանդները կուլ են տալիս պատահաբար կամ դիտավորյալ, սակայն, ինչպես նրանք են ասել, ատամի խոզանակ կուլ տալուն առաջին անգամ էին հանդիպում:
85-ամյա տղամարդը շտապ բուժօգնության է դիմել Գալիլեյի բժշկական կենտրոն (Նագարիա, Իսրայել) եւ բժիշկներին ասել, որ ատամի խոզանակը կուլ է տվել, երբ ուտելուց հետո փորձել է ատամները մաքրել: Նրան դիմավորած բժիշկ Ռոնիտ Բար-Չայմը այցելուին համակարգչային տոմոգրաֆիա կատարելու է ուղարկել, որով պարզվել է, որ տարեց տղամարդու կերակրափողում իսկապես ատամի խոզանակ է խցանվել:
Բժիշկներին հաջողվել է քիչ ինվազիվ վիրահատությամբ արագ հանել խոզանակը: Միջամտությունից հետո ոչ մի բարդություն չի եղել՝ ո՛չ խոզանակը, ո՛չ միջամտությունը հիվանդին չեն վնասել, ուստի երկարատեւ հոսպիտալացման անհրաժեշտություն չի առաջացել:
«Ամեն տարի մենք հարյուրավոր դեպքերի ենք բախվում, երբ մարդիկ տարբեր առարկաներ են կուլ տալիս կամ այդ առարկաները խցանվում են նրանց քթի մեջ: Նման բանը հաճախ է պատահում մանկահասակ, փոքր երեխաների եւ ծերունիների հետ: Այդուհանդերձ, ատամի խոզանակ կուլ տալու այս դեպքը եզակի էր: Ես ուրախ եմ, որ հաջողվեց խոզանակն արագ հանել, եւ այդ ընթացքում ոչ մի բարդություն չառաջացավ: Հիվանդը կարողացավ արագ վերադառնալ բնականոն կյանքին, նրան հոսպիտալացնելու կարիք չեղավ», - ասել է բժիշկ Օհադ Ռոնենը, որն իր գործընկեր բժիշկ Իլի Լուիսի հետ վիրահատել է տարեց հիվանդին:
Հետևեք NEWS.am Medicine-ին Facebook-ում և Twitter-ում