Ցածր կալորիականությամբ դիետաները օգնում են նիհարել, սակայն սրտի համար շատ վտանգավոր են, պնդում են Oxford University-ի գիտնականները: Ըստ նրանց՝ կալորիականության սահմանափակման պայմաններում սրտի մկանների աշխատանքում կարող են փոփոխություններ առաջանալ, որոնք իրենց հերթին կարող են հանգեցնել սրտի դիսֆունկցիայի:
Գիտնականները պարզել են, որ սովորական քանակությամբ կալորիաների պակասի պայմաններում մարմինը միացնում է ադապտացիայի ռեժիմը, եւ սրտի շուրջ ճարպը մեծանում է:
Ուսումնասիրությանը 21 մարդ է մասնակցել, որոնց միջին տարիքը 52-ն էր: Բոլոր կամավորները տառապում էին ճարպակալմամբ: Ութ շաբաթվա ընթացքում մասնակիցներն օրական ընդամենը 600-800 կալորիա էին ընդունել:
Արդյունքները հետեւյալն էին. կամավորները կալորիաների կրճատման շնորհիվ նիհարել էին: Ճարպային ներքին կուտակումների ընդհանուր քանակը քչացել էր, իսկ լյարդի ճարպային կուտակումները նվազել էին 42 տոկոսով:
Սակայն պարզվել է նաեւ, որ կալորիականության կրճատման ֆոնին սրտի շուրջ ճարպի կուտակումը կտրուկ ավելացել էր՝ 44 տոկոսով: Այս փոփոխությունը խաթարում է սրտի՝ արյուն մղելու ունակությունը, հայտնել են գիտնականները:
«Ցածր կալորիականությամբ սննդակարգը կարող է արդյունավետ լինել քաշի կորստի, արյան ճնշման եւ արյան գլյուկոզայի մակարդակների համար: Սակայն դրանց՝ սրտի վրա ազդեցությունը դեռ քիչ է ուսումնասիրվել: Պարզվել է, որ կալորիաների կրճատումը մարմնի տարբեր մասերից ճարպն արյան հետ տեղափոխվում է դեպի սրտի մկանները, թեեւ դա տեղի է ունենում նոր սննդակարգին հարմարվելու «սուր ժամանակահատվածում»: Օրգանիզմի ադապտացումից հետո սրտի աշխատանքը կրկին բարելավվում է»,- պատմել են հետազոտության հեղինակները:
Հետևեք NEWS.am Medicine-ին Facebook-ում և Twitter-ում