K վիտամինի հավելումները կարող են մեծացնել թրոմբոզի վտանգը. Health News

K վիտամինի հավելումներն անուղղակիորեն մեծացնում են թրոմբի վտանգը, իսկ բետա-կարոտինը ծխողների շրջանում մեծացնում է թոքերի քաղցկեղի առաջացման վտանգը: Որոշ այլ միացություններ և բուսական բաղադրիչներ (C և E վիտամիններն ու սրոհունդը) նվազեցնում են քաղցկեղի, դեպրեսիայի և սրտի հիվանդությունների բուժման արդյունավետությունը: Դրա մասին Health News-ի հետ զրույցում ասել է Օտտավայի համալսարանի ընտանեկան բժշկության ամբիոնի դոցենտ Էրիկ Վուլթորթոնը:

Ըստ Վուլթորթոնի՝ սննդային հավելումները և վիտամինահանքային զուգակցությունները կարող են բաղկացած լինել օրգանիզմի վրա ազդեցություն ունեցող բաղադրիչներից, որոնք համադրելի են դեղատոմսով դեղերի ազդեցության հետ: Ընդ որում, շատ մարդիկ հավելումներն օգտագործում են՝ առանց նախապես բժշկի հետ խորհրդակցելու:

Մասնագետը պարզաբանել է, որ որոշ դեպքերում նման «ինքնահրահանգների» առողջական ռիսկերը կարող են գերազանցել հնարավոր օգուտները: Բոլոր վիտամինների, հանքանյութերի և բուսական մզվածքների օգտագործման ժամանակ պետք է չափավորություն պահպանել: Առանձապես զգույշ պետք է լինեն դեպրեսիայի և սրտի հիվանդությունների դեմ դեղորայքային բուժման ենթարկվող, ինչպես նաև քաղցկեղի դեմ քիմիաթերապիա անցնող մարդիկ:

Բանն այն է, որ որոշ հավելումներ կարող են նվազեցնել բուժման արդյունավետությունը: K վիտամինն ընդունակ է թուլացնելու արյունը նոսրացնող դեղերի ազդեցությունը, որի շնորհիվ հնարավոր է դառնում թրոմբների առաջացումը կանխելը:

C և E վիտամիններն էլ կարող են նվազեցնել քիմիաթերապիայի արդյունավետությունը, իսկ սրոհունդը կարող է բացասաբար անդրադառնալ հակադեպրեսանտների և սիրտ-անոթային հիվանդությունների բուժման համար նշանակված որոշ դեղամիջոցների ազդեցության վրա։

Մեկ այլ պոտենցիալ վտանգավոր սննդային հավելում էլ բետա-կարոտինն է: Նախորդ հետազոտությունները ցույց են տվել, որ բետա-կարոտինը, որպես հակաօքսիդանտ, նվազեցնում է քաղցկեղի զարգացման հավանականությունը։ Սակայն վերջին տասնամյակների ընթացքում գիտնականները եզրակացրել են, որ բետա-կարոտինի օգտագործումը, ընդհակառակը, ծխողների շրջանում մեծացնում է թոքերի քաղցկեղի և շագանակագեղձի քաղցկեղի հավանականությունը:

Հետևեք NEWS.am Medicine-ին Facebook-ում և Twitter-ում