Մեր մարմնի յուրաքանչյուր բջիջ արձագանքում է հորմոնային ինսուլինին: Սակայն եթե բջիջները դադարում են ընկալել ինսուլինը կամ այն օրգանիզմում չափազանց քիչ է, ապա մարդու մոտ շաքարախտ է զարգանում: Joslin Diabetes Center-ի ամերիկացի գիտնականները 4 վիրուս են հայտնաբերել, որոնք ինսուլինանման հորմոններ են արտադրում: Այս բացահայտումը մեծ նշանակություն ունի շաքարախտի զարգացման մեխանիզմի եւ դրա բուժման ընկալման համար:
Մասնագետներն ուսումնասիրել են վիրուսների գենոմային հաջորդականություններ պարունակող խոշոր տվյալների բազաները: Նրանք գտել են չորս վիրուսներ, որոնք մակաբուծվում են ձկների մեջ հանդիպող մակաբույծներ են եւ ինսուլինանման սպիտակուցներ կոդավորող գենոմի հատվածներ են պարունակում: Այս բոլոր հորմոններն ակտիվ էին նաեւ մարդու բջիջների նկատմամբ: Մկները, որոց ներարկվել էին հայտնաբերված հորմոնները, արձագանքել են դրանց նույն կերպ, ինչ ինսուլինի դեպքում:
Հայտնաբերված վիրուսները հանդիպում են միայն ձկների մոտ, սակայն սննդի հետ կարող են հայտնվել նաեւ մարդու օրգանիզմում: Այժմ գիտնականներն ուսումնասիրում են վիրուսների՝ աղիների պատերի միջոցով մարդու օրգանիզմ ներթափանցելու ունակությունը: Եթե այս վիրուսներն ունակ են դրան, չի բացառվում, որ հենց դրանք էլ մեղավոր են շաքարախտի զարգացման համար:
Հետագայում այս բացահայտումները կարող են օգնել ինսուլինի նոր տեսակներ մշակել, որոնք կպահվեն առանց սառնարանի եւ ավելի երկար կգործեն:
Հետևեք NEWS.am Medicine-ին Facebook-ում և Twitter-ում