Հղիանալու ամիսը եւ հետծննդյան դեպրեսիան փոխկապված են: Այս մասին նշված է Սան Խոսեի համալսարանի գիտնականների հետազոտության մեջ:
Պարզվել է, որ հունվարին հղիացած կանանց շրջանում հետծննդյան դեպրեսիան ավելի հաճախ է դիտվում: Փորձագետների կարծիքով, սա կապված է հղիության շրջանում արեւի լույսի պակասի հետ: Արդյունքում՝ կանայք, որոնք հղիացել են տարեսկզբի առաջին ամիսներին, հետագայում ավելի հաճախ են բախվում հետծննդյան դեպրեսիային, ընդ որում՝ այս օրինաչափությունը դիտվում է հյուսիսային կիսագնդում բնակվող կանանց շրջանում:
Ապագա մայրերի մոտ արեւի լույսի պակասի պատճառով սրվում են հոգեկան խանգարումները, այդ թվում՝ հետծննդյան դեպրեսիան:
Մասնագետները վերլուծել են 293 կանանց մասնակցությամբ երկու հետազոտությունների տվյալները: Գնահատվել են հետեւյալ գործոնները՝ հղիության վերջին երեք ամսում արեւոտ օրերի թիվը, հետծննդյան դեպրեսիայի մակարդակը: Արդյունքները ցույց են տվել, որ հունվարին կամ փետրվարին երեխայի բեղմնավորումը 30 տոկոսով մեծացրել է հետծննդյան դեպրեսիայի զարգացման հավանականությունը:
Դեպրեսիայի առաջացման հավանականության վտանգը մինչեւ 26 տոկոսով նվազել է, երբ կանայք հղիության վերջին երեք ամիսն անցկացրել են ամռանը: Հետծննդյան դեպրեսիան ավելի ծանր ձեւով է ընթացել, եթե երրորդ երեք ամիսը համընկել է աշնան-ձմռան շրջանին:
Հետևեք NEWS.am Medicine-ին Facebook-ում և Twitter-ում