Institute for Molecular Engineering at the University of Chicago-ի գիտնականները մալարիայի դեմ պատվաստանյութը ճիշտ տեղը հասցնելու ինովացիոն համակարգ են մշակել, որն ապահովում է իմունային բջիջների վրա թիրախային ազդեցությունը, որը ավելի հզոր իմունային պատասխան է տալիս հակամարմինների արտադրման տեսքով:
Մալարիայի դեմ պատվաստանյութը վաղուց գոյություն ունի, սակայն դրա արդյունավետությունը 50 տոկոսից չի անցնում: Նոր մոտեցումը կարող է հնարավորություն տալ հաղթահարել այդ պատնեշը եւ այս հիվանդությունից ավելի արդյունավետ պաշտպանություն ապահովել:
Ինչո՞ւ է մալարիայի դեմ արդյունավետ պատվաստանյութի մշակումն այդքան խնդրահարույց: Բանն այն է, որ պատվաստանյութը ներարկելուց հետո անհրաժեշտ է ե՛ւ ախտածինից պաշտպանություն, ե՛ւ հատուկ իմունային բջիջների առկայություն մարմինը վարակված բջիջներից մաքրելու համար: Այս նպատակով վերցնում են սպիտակուց-հակագեներ, որոնք ստացվել են հարուցիչից, եւ դրանք փոփոխում են ադյուվանտ միացության միջոցով, որն առաջացնում է հակաբորբոքային պատասխան: Հակագենը իմունիտետին ծանոթացնում է ինֆեկցիայի հետ, իսկ ադյուվանտն ակտիվացնում է ախտածին յուրահատուկ Т-բջիջները, որոնք օգնում են մարմինը մաքրել վարակված բջիջներից: Նման մոտեցումն օգտագործվում է կապույտ հազի, մարդու պապիլոմա վիրուսի եւ մալարիայի դեմ պատվաստանյութերում:
Հակագեների արդյունավետության հետ կապված հարցեր չկան, իսկ ահա ադյուվանտների դեպքում ամեն ինչ այնքան էլ պարզ չէ. դրանք պետք է հասցնել ճշգրիտ տեղը, այլապես բորբոքային պրոցեսը կտարածվի ամբողջ օրգանիզմում: Չիկագոյացի գիտնականներն օգտագործել են պոլիմերային ադյուվանտ, որը կազմված է ադյուվանտի բազմաթիվ մոլեկուլներից, որոնք իրար են միացած մանյակի ուլունքների նման, եւ մանոզից (շաքարի տեսակ): Դրանց են հավելել անհրաժեշտ հակագենը:
Քանի որ բակտերիաների եւ վիրուսների մակերեւույթին շատ շաքար կա, ավշահանգույցներում դենդրիտային բջիջները շաքարի նկատմամբ ռեցեպտորներ ունեն: Սա մարմնին թույլ է տալիս ախտածինները ճանաչել: Հենց մանոզով պատվաստանյութը մարմնի մեջ է հայտնվում, այն անմիջապես թիրախավորում է դենդրիտային բջիջները, որոնք ակտիվացնում են իմունային Т-բջիջները: Այս սխեման թույլ է տալիս հզոր իմունային պատասխանի պահպանման պարագայում խուսափել համակարգային բորբոքման զարգացումից:
Հետևեք NEWS.am Medicine-ին Facebook-ում և Twitter-ում