Վերջին շրջանում մենք հաճախ ենք խորհուրդներ լսում այն մասին, որ պետք է պառկել քնելու ժամը 22-23-ից ոչ ուշ՝ միայն այդպես կարելի է քունն առնել եւ առավոտյան առույգ արթնանալ: Ոմանց անգամ խորհուրդ են տալիս ավելի շուտ պառկել քնելու՝ երեկոյան ժամը 19-20-ին:
Արդյոք իսկապես կարեւո՞ր է, թե որ ժամին է մարդը պառկում քնելու: Կարո՞ղ է արդյոք քնելու ժամն ազդել քնի որակի վրա: Այս հարցերին պատասխանել է նյարդաբան Լուսինե Վարդանյանը:
Մասնագետի կարծիքով, իրականում կարեւոր չէ, թե որ ժամին է մարդ պառկում քնելու, կարեւոր է մեկ այլ բան՝ օրական 7 ժամից պակաս չքնելը:
Սա նշանակում է, որ եւ արտույտները եւ բուերը կարող են նորմալ քունն առնել, եթե օրական գոնե 7 ժամ քնեն: Եթե դուք արթնանում եք առավոտյան 6-ին, պետք է երեկոյան 23:00-ից ոչ ուշ պառկել քնելու: Բայց եթե դուք բու եք եւ սովորել եք պառկել քնելու գիշերը 3:00-ին, լիովին նորմալ է, եթե դուք քնեք մինչեւ առավոտյան 10-ը:
Քունը նորմալ առնելու համար, կարեւոր է ոչ թե այն, թե որ ժամին է մարդը պառկում քնելու, այլ որքանով է այն լիարժեք եւ առանց ընդհատումների տեւում:
Եթե մարդն ամբողջ 7 ժամվա ընթացքում նորմալ է քնում, առավոտյան նա առույգ եւ քունն առած կարթնանա:
Իսկ եթե գիշերը նա մի քանի անգամ արթնանա, չի կարողանա լիարժեք քունն առնել, եթե անգամ վաղ պառկի քնելու եւ մինչեւ կեսօր քնի:
Քնի որակի բարձրացման համար, ինչպես նշեց մասնագետը, կարեւոր է հետեւել այսպես կոչված քնի հիգիենային. աշխատեք քնել եւ արթնանալ նույն ժամին, ամեն օր, այդ թվում հանսգտյան օրերին: Քնելուց առաջ աշխատեք չուտել, ալկոհոլային խմիչքներ չխմել եւ չնայել հեռուստացույցի, համակարգչի կամ հեռախոսի էկրանին:
Հետևեք NEWS.am Medicine-ին Facebook-ում և Twitter-ում