Այովայի համալսարանի գիտնականները դեպրեսիայի դեմ պայքարի նոր մեթոդ են առաջարկել:
Փորձարկմանը մասնակցելու համար ներգրավվել է 17 կին, որոնց մոտ դեպրեսիա էր ախտորոշված: Բոլորը պետք է մասնակցեին երկու կես ժամանոց մարզումների հեծանվամարզասարքերի վրա, ընդ որում՝ մի դեպքում մարզումների ինտենսիվությունը նախապես էր համաձայնեցված, իսկ մյուս դեպքում կանայք իրենք էին այն ընտրելու:
Այնուհետեւ գիտնականները կամավորների արյան նմուշներն ուսումնասիրել են ֆիզիկական ակտիվությունից առաջ եւ հետո, ինչպես նաեւ գնահատել են մարզումներն ավարտելուց հետո 10 եւ 30 րոպե անց կանանց տրամադրությունը եւ տագնապայնության մակարդակը: Պարզվել է, որ ինտենսիվության երկու ռեժիմներում էլ մարզումները դրական են անդրադարձել մասնակիցների տրամադրության վրա, սակայն նախապես հանձնարարված ինտենսիվությամբ մարզումներն ավելի երկարատեւ արդյունքի են հասել:
Դրանից բացի, համաձայնեցված ինտենսիվությամբ մարզումներից հետո փորձարկվողների արյան մեջ մեծացել է էնդոկանաբինոիդների մակարդակը` կապված ցավի եւ դեպրեսիայի ախտանշանների մեղմացման հետ:
Հետազոտության արդյունքները ավելի մանրամասն ներկայացված են Medicine & Science in Sports & Exercise գիտական պարբերականում:
Հետևեք NEWS.am Medicine-ին Facebook-ում և Twitter-ում