Կանանց շրջանում դաշտանի կանոնավորությունը նրանց առողջության կարեւոր նշանն է, եւ դաշտանի ցիկլի անկանոնությունը կարող է վկայել առողջության հետ կապված խնդիրների եւ նույնիսկ վաղ մահվան ռիսկի մեծացման մասին: Այս մասին հաղորդվում է հետազոտության մեջ, որը հրապարակվել է The BMJ-ում:
Նոր տվյալների համաձայն` չափազանց երկար ցիկլով եւ անկանոն դաշտանով կանանց մոտ մահվան հավանականությունը մեծանում է մինչեւ 70 տարեկան, հաղորդում է Medportal.ru-ն:
Հարվարդի համալսարանի Հանրային առողջապահության դպրոցի գիտնականները վերլուծել են գրեթե 80.000 կնոջ դաշտանի ցիկլի եւ առողջական վիճակի վերաբերյալ տվյալները, ովքեր ավելի վաղ մասնակցել էին Բուժքույրերի առողջության II խոշոր հետազոտությանը:
Ինչպես պարզվել է, 40 օրից ավել եւ անկանոն ժամանակահատված դաշտանի ցիկլ ունեցող կանանց մոտ վաղաժամ մահվան ավելի մեծ ռիսկ գոյություն ունի, քան սովորական տեւողությամբ (26-31 օր) ռեգուլյար ցիկլ ունեցող կանանց մոտ:
Կանայք, ում դաշտանային ցիկլն անկանոն էր, երբ նրանք 29-46 տարեկան էին, վաղաժամ մահվան ռիսկի մեծացել է 39 տոկոսով: Այսպիսի վաղ մահացության հիմնական պատճառը սրտանոթային համակարգի հիվանդություններն էին: Սակայն, ինչպես սպասվում էր, այս ռիսկն ավելի մեծ էր ծխող կանանց մոտ:
Հետազոտության մեջ նշվում է, որ դաշտանային ցիկլն անկանոն դարձնող պատճառները կարող են ազդել կնոջ առողջության եւ կյանքի տեւողության վրա: Օրինակ` պոլիկիստոզ ձվարանների համախտանիշի դեպքում դաշտանը սովորաբար անկանոն է լինում: Միեւնույն ժամանակ, այս սինդրոմը կապված է շաքարախտի, հիպերտոնիայի եւ արգանդի քաղցկեղի բարձր ռիսկի հետ:
Հեղինակները կարծում են, որ կանայք միշտ պետք է բժիշկներին հաղորդեն դաշտանային ցիկլի խախտումների մասին: Բժիշկներն իրենց հերթին պետք է հիշեն, որ դաշտանային ցիկլի խախտումները կարող են խոսել այլ առողջական խնդիրների մասին, որոնք պետք է շտկվեն:
Հետևեք NEWS.am Medicine-ին Facebook-ում և Twitter-ում