Ճապոնիայի առողջապահության նախարարությունը դենգե տենդով վարակման եւս 19 դեպքերի մասին շրջանառվող լուրերի հաստատմամբ է հանդես եկել: Սեպտեմբերի 2-ի դրությամբ վարակվածների ընդհանուր թիվը 22-ի է հասել: Հիշեցնենք՝ նախօրերին հաղորդագրություն էր ստացվել առ այն, որ հիվանդությունը հիշեցնող ախտանշաններ են հայտնաբերվել բժիշկների օգնությանը դիմած 10 ճապոնացիներ մոտ:
BBC-ի հաղորդմամբ, վերջին 70 տարիների ընթացքում սա առաջին դեպքն է, երբ Ճապոնիայում տվյալ վիրուսային հիվանդության համաճարակ է արձանագրվում:
Ենթադրվում է, որ վարակը Տոկիոյի կենտրոնական այգիներից մեկում՝ Յոյոգիում բնակվող մոծակներն են տարածել: Ներկայումս այն պեստիցիդների օգնությամբ վերամշակման է ենթարկվում՝ վնասակար միջատներից ազատվելու նպատակով:
Դենգե տենդը գլխավորապես Հարավային եւ Հարավ-արեւելյան Աիսայի, Աֆրիկայի, Օկեանիայի եւ Կարիբյան ավազանի երկրներում է տարածված:
Հիվանդության ախտանշաններից են բարձր ջերմությունը, գլխապտույտը, ցանը եւ մկանային ցավը:
Հետևեք NEWS.am Medicine-ին Facebook-ում և Twitter-ում