Իսրայելական հետազոտությունը ցույց է տվել, որ սպիտակուցով, ցինկով եւ վիտամին B3-ով հարուստ միջերկրածովյան դիետային հետեւող մարդիկ կարող են բարելավել սրտի առողջությունը:
Քաշի կորստի ծրագրին մեկ տարի մասնակցելուց հետո, որը ֆիզիկական վարժությունների անհատական պլան, ինչպես նաեւ միջերկրածովյան դիետայի «ցածր կալորիականությամբ, բարձր սպիտակուցային» տարբերակի վրա հիմնված սննդակարգային փոփոխություններ էր ներառում, 72 մասնակիցների քաշը, որոնց միջին տարիքը 53 էր, նվազել էր 9 տոկոսով։
Հետազոտությունը ցույց է տվել, որ նրանց սրտի առողջությունը բարելավվել է մի քանի հիմնական ցուցանիշներով, այդ թվում՝ զարկերակային կոշտության, քներակի խտացման եւ արյան հոսքի միավորների, վկայում են չորեքշաբթի Մաաստրիխտում Ճարպակալման եվրոպական կոնգրեսի ժամանակ ներկայացված տվյալները:
Ըստ գիտնականների՝ հետազոտության սկզբում բոլոր մասնակիցների մոտ նյութափոխանակության համախտանիշ է նկատվել՝ որովայնի ճարպակալում, արյան բարձր ճնշում, արյան մեջ շաքարի բարձր մակարդակ, արյան շիճուկում «վատ» խոլեստերինի բաձր եւ «լավ» խոլեստերինի ցածր մակարդակ։
Պատմականորեն այնպես է ստացվել, որ գեր մարդկանց մոտ քաշի կորստից հետո նյութափոխանակության եւ սրտի առողջության բարելավումները վերագրվում են կամ քաշի կորստին կամ արյան մեջ շաքարի մակարդակի եւ ճնշման փոփոխություններին, նշել է հետազոտության համահեղինակ Բրուրիա Տալը: Սակայն գիտնականները չեն բացառել, որ այդ գործընթացում ներգրավված է նաեւ բուն դիետայի բաղադրությունը եւ դրանում պարունակվող կոնկրետ սննդանյութերը։
Հետևեք NEWS.am Medicine-ին Facebook-ում և Twitter-ում