Սիերա-Լեոնեի կառավարությունը, Էբոլա վիրուսի հետագա տարածումը կանխելու նպատակով, երկրի բնակիչներին 72 ժամ տնից դուրս չգալու հորդոր է հղել: ԻՏԱՌ-ՏԱՍՍ-ի հաղորդմամբ, Արեւմտյան Աֆրիկայում գտնվող պետության իշխանությունների պաշտոնական հաղորդագրության մեջ նշվում է, որ 6 մլն բնակիչների «տանը մնալու» արշավը սեպտեմբերի 19-ին է մեկնարկելու:
Տեղացի համաճարակաբանները հույս ունեն, որ վերը հիշատակված միջոցառման արդյունքում հնարավոր է Էբոլա վիրուսով հրահրված հեմոռագիկ տենդի տարածման դեմ լուրջ խոչընդոտներ հարուցել: Ենթադրվում է, որ երկրի քաղաքացիները, արշավի ողջ ընթացքում, միայն ծայրահեղ անհրաժեշտության պարագայում են փողոց դուրս գալու: Մինչ այդ, շուրջ 20 հազար կամավորներ շրջելու են բոլոր բնակելի տարածքներով՝ տենդից մահացածների մարմինները հեռացնելու եւ վարակվածներին հիվանդանոց տեղափոխելու նպատակով: Մի շարք հաստատությունների, օրինակ՝ դպրոցների բազայի վրա մահացու վտանգավոր հիվանդությամբ վարակվածների համար նախատեսված մեկուսացման եւ խնամքի կենտրոններ են գործարկվելու:
Համաճարակի դեմ պայքարին միտված հատուկ գործողության՝ երկրի մայրաքաղաք Ֆրիթաունում գործող շտաբի ներկայացուցիչներն ակնկալում են, որ հիվանդների մեկուսացման արշավը վիրուսով վարակված մարդկանց բացահայտման դեպքերի 20 տոկոսի չափով ավելացման կարող է հանգեցնել:
Հոռետեսներն, այդուհանդերձ, կասկածանքով են վերաբերվում աշխարհի ամենաաղքատ երկրներից մեկի՝ Սիերա-Լեոնեի՝ նախանշված արշավն արդյունավետ կերպով կազմակերպելու կարողությանը: Ավելին՝ մտահոգություններ կան, որ նմանատիպ միջոցառումները կարող են համաճարակի սրացման հանգեցնել:
Հետևեք NEWS.am Medicine-ին Facebook-ում և Twitter-ում