Յոգան եւ նրա մեջ մտնող շնչառական վարժություններն ու գիտակցվածության պրակտիկաներն օգնում են նվազեցնել գոտկատեղի քրոնիկական ցավերը։ Այս մասին է վկայում Կատանձարոյի Մեծ Հունաստանի համալսարանի գիտնականների հետազոտությունը, որը հրապարակվել է Journal of Orthopaedic Research-ում։
Փորձին մասնակցել է գոտկատեղի ոչ սպեցիֆիկ ցավ ունեցող 10 եւ ցավ չունեցող 11 կին։ Նրանք զբաղվել են յոգայով շաբաթը երկու անգամ չորս շաբաթվա ընթացքում։ Յոգայի առաջին պրակտիկան անցկացվել է կլինիկայում, իսկ հետո կանայք զբաղվել են մարզչի հսկողությամբ, հեռավար։
Միջին ցավը տասը բալանոց վիզուալ սանդղակով կազմել է 6,80 բալ սկզբում։ Այն իջել է՝ հասնելով 3,30-ի յոգայի պարապմունքներից հետո։ Բացի այդ, կանանց մոտ ավելի քան չորս բալով բարելավվել է գոտկատեղի մկանների թուլանալու ունակությունը մարմինը թեքելիս։
Արդյունքները նշանակում են, որ յոգան կարող է դրական ազդեցություն ունենալ նյարդամկանային պատասխանի վրա մարմնի թեքման ժամանակ եւ մեղմել գոտկատեղի քրոնիկական ցավի ախտանշանները։ Հեղինակները նշել են, որ պահանջվում են յոգայի երկարաժամկետ էֆեկտների պարզման հետագա ուսումնասիրություններ։
Հետևեք NEWS.am Medicine-ին Facebook-ում և Twitter-ում