Ամերիկյան հետազոտողները հիվանդության վերջին փուլերում գտնվող լեյկեմիայի բուժման փորձարարական մեթոդ են մշակել: Թերապիայի այդ տեսակն արդյունավետություն է ցույց տվել այն հիվանդների դեպքում, ովքեր արդեն մահվան էին սպասում, քանի որ բուժման մյուս մեթոդներն անարդյունավետ են եղել:
Ֆիլադելֆիայի Մանկական հիվանդանոցի եւ Փենսիլվանիայի համալսարանին կից հիվանդանոցի գիտնականների մշակած նոր մեթոդը ներառում է հիվանդների սեփական իմունային համակարգից գենետիկորեն ծրագրված բջիջների ներարկում, որոնք սկսում են պայքարել հիվանդության դեմ: Կլինիկական հետազոտությանը մասնակցել է 30 հիվանդ, որոնցից 5-ը՝ 26-60 տարեկան, 25-ը՝ 5-22 տարեկան:
Բոլորն էլ ծանր հիվանդ են եղել եւ գտնվել են սուր լիմֆոբլաստիկ լեյկոզի վերջին փուլում: Փորձարարական բուժումը սկսելու պահին հիվանդներն արդեն մի քանի թերապիա էին հաղթահարել եւ դադարել էին արձագանքել ավանդական բուժմանը: Հիվանդների կեսի դեպքում հիվանդությունը վերադարձել է նույնիսկ ցողունային բջիջների փոխպատվաստումից հետո:
Բժիշկների գնահատմամբ՝ գիտափորձի բոլոր մասնակիցներին մի քանի ամսվա կյանք էր մնում, իսկ որոշ դեպքերում՝ նույնիսկ մի քանի շաբաթվա, սակայն փորձարարական բուժումը սկսելուց 6 ամիս անց 30 հիվանդներից 23-ը դեռեւս ողջ են եղել, իսկ 19-ի մոտ հիվանդության նահանջ է գրանցվել:
Հետևեք NEWS.am Medicine-ին Facebook-ում և Twitter-ում