Սուրճի «օպտիմալ չափաբաժինը» կարող է երկարաժամկետ հեռանկարում նպաստել հոգեկան առողջությանը

Առավոտյան մեկ գավաթ սուրճը ոչ միայն արթնանալու միջոց է, այլև հնարավոր աջակցություն հոգեկան առողջությանը: Ֆուդանի համալսարանի (Fudan University) գիտնականները նոր հետազոտության շրջանակներում ուսումնասիրել են, թե ինչպես են օգտագործվող սուրճի քանակն ու տեսակը ազդում սթրեսային և աֆեկտիվ խանգարումների զարգացման ռիսկի վրա:

Վերլուծելով ավելի քան 400,000 մարդու տվյալներ՝ հետազոտողները պարզել են, որ սուրճի չափավոր օգտագործումը՝ օրական մոտ 2–3 գավաթ, կապված է տագնապի և դեպրեսիայի ամենացածր ռիսկի հետ: Արդյունքները հրապարակվել են Journal of Affective Disorders ամսագրում: Ընդ որում, պաշտպանիչ ազդեցությունն ավելի արտահայտված է եղել տղամարդկանց, քան կանանց մոտ:

Հավասարակշռության որոնում

Հոգեկան խանգարումները դառնում են համաշխարհային գլխավոր խնդիրներից մեկը: Այդ պատճառով գիտնականներն ավելի հաճախ են ուշադրություն դարձնում առօրյա սովորություններին, այդ թվում՝ սննդակարգին և ըմպելիքներին (որպես կանխարգելման հնարավոր միջոցների):

Սուրճը հետաքրքրություն է առաջացնում իր բաղադրության մեջ առկա կոֆեինի շնորհիվ. դա մի նյութ է, որն արգելափակում է ադենոզինը (ուղեղին փոխանցվող հոգնածության ազդանշանը) և բարձրացնում առույգությունը: Չափավոր քանակությամբ օգտագործելու դեպքում այն կարող է նաև բարձրացնել դոֆամինի մակարդակը, որը պատասխանատու է մոտիվացիայի և տրամադրության համար:

Ինչո՞վ է կարևոր այս հետազոտությունը

Նախկինում սուրճի ազդեցության վերաբերյալ տվյալները հակասական էին: Շատ հետազոտություններ հաշվի չէին առնում սուրճի տեսակների և օգտագործման ծավալների միջև եղած տարբերությունները:

Այս դեպքում գիտնականներն օգտագործել են UK Biobank-ի տվյալները՝ 13,4 տարի շարունակ դիտարկելով 461,586 մասնակցի:

Այդ ժամանակահատվածում գրանցվել է տրամադրության խանգարման ավելի քան 18,000 դեպք և մոտավորապես նույնքան սթրեսային խանգարումների դեպքեր:

J-աձև կախվածություն

Հետազոտության արդյունքները ցույց են տվել J-աձև կորի առկայություն. առավելագույն օգուտը նկատվել է չափավոր օգտագործման դեպքում, մինչդեռ սուրճի թե՛ չափազանց քիչ, թե՛ չափից շատ քանակությունը կապված է եղել հիվանդությունների զարգացման ավելի բարձր ռիսկի հետ:

Օրական հինգ և ավելի գավաթ սուրճ խմելը, ընդհակառակը, բարձրացրել է տրամադրության խանգարումների առաջացման հավանականությունը:

Գենետիկայի ազդեցություն

Գիտնականները նաև ուսումնասիրել են գենետիկայի ազդեցությունը կոֆեինի նյութափոխանակության վրա։ Պարզվել է, որ կոֆեինի վերամշակման արագության տարբերությունները էականորեն չեն ազդում սուրճի և հոգեկան առողջության միջև ընդհանուր կապի վրա։

Անհատական ​​զգայունություն

Չնայած դրական եզրակացություններին՝ սուրճը բոլորին չէ, որ համապատասխանում է: Որոշ մարդկանց մոտ նույնիսկ փոքր չափաբաժինները կարող են առաջացնել տագնապ, անհանգստություն կամ սրտխփոց:

Ընդհանուր առմամբ, հետազոտությունն ընդգծում է, որ օգուտ ստանալու գրավականը չափավորությունն է: Շատերի համար օպտիմալ տարբերակը կարող է լինել օրական 2–3 գավաթ սուրճի օգտագործումը:

Հետևեք NEWS.am Medicine-ին Facebook-ում և Twitter-ում