Հայաստանում ընդլայնվել են ուռուցքաբանական հիվանդությունների բուժման հնարավորությունները

Առողջության համընդհանուր ապահովագրության համակարգի շրջանակում ուռուցքաբանական օգնության ծախսերն էապես ավելացել են։ Այս մասին հայտարարել է Առողջության համընդհանուր ապահովագրության հիմնադրամի ժամանակավոր պաշտոնակատար Սամվել Խարազյանը։

Առանձնահատուկ ուշադրություն է դարձվել քիմիաթերապևտիկ ծառայություններին և պացիենտներին անհրաժեշտ դեղորայքով ապահովմանը։ Նրա խոսքով՝ հենց այս ուղղությամբ են տեղի ունեցել ամենանկատելի փոփոխություններից մի քանիսը։ Նախկինում գործող պետական պատվերի համակարգի համեմատ՝  քիմիաթերապիայի ֆինանսավորման ծավալներն ավելացվել են շուրջ տասն անգամ։

Եթե նախկինում քաղաքացիները կարող էին օգտվել քիմիաթերապիայի պետպատվերի ծրագրից մինչև 150 հազար դրամի սահմաններում, ապա համապարփակ ապահովագրության ներդրումից հետո այդ սահմանաչափը բարձրացվել է մինչև 1,2 միլիոն դրամ։ Այսպիսով, ապահովագրված քաղաքացիները ապահովագրական տարվա ընթացքում կարող են ստանալ մինչև 1,2 միլիոն դրամի քիմիաթերապևտիկ բուժում։

Ապահովագրական փաթեթն այժմ ամբողջությամբ փոխհատուցում է նաև ժամանակակից տեխնոլոգիաներով իրականացվող ուռուցքաբանական վիրահատությունները։ Նման վիրահատությունները լիովին փոխհատուցվում են ապահովագրական համակարգի կողմից։

Հիմնադրամի հաշվին ամբողջությամբ ծածկվում է նաև բարձրտեխնոլոգիական սարքավորումների կիրառմամբ ճառագայթային թերապիան։

Այսպիսով, նոր համակարգն ընդլայնել է ուռուցքաբանական հիվանդություններ ունեցող պացիենտների հասանելիությունը համալիր բուժմանը, ներառյալ՝ դեղորայքային թերապիան, ժամանակակից վիրաբուժական մեթոդները և բարձրտեխնոլոգիական ճառագայթային թերապիան։

Հետևեք NEWS.am Medicine-ին Facebook-ում և Twitter-ում